Xanım Fatimənin (s.ə) Fədək xütbəsinin tərcümə və şərhi
(Silsilə 14 )
Fitnələr qarşısında Həzrət Peyğəmbərin (s) və Həzrət Əlinin (ə) çətinlikləri
1.
فَاَنْقَذَكُمُ اللَّهُ تَبارَكَ وَ تَعالى بِمُحَمَّدٍ صَلَّى اللَّهُ عَلَيْهِ وَالِهِ بَعْدَ اللّيََّتَا وَ الَّتي
Ancaq Allah təbarək və təala sizləri həzrət Muhəmmədin(s) bərəkəti ilə bütün bu zillət, xarlıq, acizlikdən xilas etdi. Sizi xilas etmək həzrət Muhəmməd üçün çox da asan deyildi.
2.
وَبَعْدَ اَنْ مُنِيَ بِبُهَمِ الرِّجالِ، وَ ذُؤْبانِ الْعَرَبِ،
O, bütün bu əziyyətlərdən və baş ağrılarından sonra nadanlıq və cahillikdən xalqın nicat tapması üçün qorxu bilməyən insanlarla və yolkəsən ərəblər ilə uzun müddət vuruşdu.
3.
وَمَرَدَةِ اَهْلِ الْكِتابِ كُلَّما اَوْقَدُوا ناراً لِلْحَرْبِ اَطْفَأَهَا اللَّهُ
Əhli kitabın (yəhudilər və xaçpərəstlər) itaətdən boyun qaçıranları ilə üzbəüz oldu. Onların hər yerdə alovlandırdığı müharibə odunu Allah təala söndürürdü.
4.
اَوْ نَجَمَ قَرْنُ الشَّيْطانِ، اَوْ فَغَرَتْ فاغِرَةٌ مِنَ الْمُشْرِكين
Yaxud şeytanın tərəfdarlarından biri baş qaldıraraq öz qüdrətini nümayiş etdirmək istəyərkən və ya zalım müşriklərin dəstəsindən fitnə alovu yandırarkən
5.
قَذَفَ اَخاهُ في لَهَواتِها
Qardaşı (Əli ibn Əbi Talibi) (ə) onların canına salırdı və fitnələri aradan aparmaq üçün onların üstünə göndərirdi.
6.
فَلا يَنْكَفِئُ حَتَّى يَطَأَ صِمَاخَهَا بِأَخْمَصِهِ، وَيَُخْمِدَ لَهَبَها بِسَيْفِهِ
O (Əli ibn Əbi Talib) tam şücaətlə meydana daxil olurdu. Dinin düşmənlərinə ağır qulaqburması vermədən, müharibə odunun şö'lələrini öz qılıncı ilə söndürmədən, gözlərini torpaqla ovmadan bu təhlükəli tapşırıqdan geri qayıtmırdı.
Şərh
Birinci: Həzrət Peyğəmbərin(s) və Əlinin(ə) cəmiyyətdə böyük haqları vardır. Çünki ədalət, azadlıq və insan haqqlarının gerçəkləşməsində çoxlu əziyyətlər və çətinliklər çəkmişlər. Əgər onların fədakarlıqları olmasaydı, dini tapşırıqların həyata keçirilməsi və insani dəyərlərin diri qalmasına heç bir ümid qalmazdı. Eləcə də həzrət Fatimə(ə) camaatın cahiliyyət dövründə olan çox çətin vəziyyətini açıqladıqdan sonra, bu mühim və bağlı qalan mövzuya işarə edərək belə buyurur:
فَاَنْقَذَكُمُ اللَّهُ... بِمُحَمَّد
yəni bu rahatlığın, insansevərliyin və asayişinin və s. sizin üçün asan şəkildə nəsib olduğunu təsəvvür etməyin! Allah təala həzrət Muhəmmədin(s) və onun qardaşı Əli ibn Əbi Talibin(ə) bərəkəti ilə sizi bu böhrandan və ağır vəziyyətdən xilas etmişdir. Nə qədər müharibələrə və fitnələrə və s. ürəkdən dözmüş və insan haqqları, azadlıq və ədalət yolunda olan maneələri aradan aparmışlar. Sizlər də bu gün həmin fədakarlığın kölgəsi altında dindarlaşıb bir-birinizin hüquqlarına hörmət edir və zavallı insanların haqlarına riayət edirsiniz.
Buna görə də İslam Peyğəmbərinin(s), həzrət Əlinin(ə) və on bir Mə'sum İmamın(ə) dinin, dindarlığın və mehribanlıq, insansevərlik, insaf, ədalət, geridə qalanlara əl tutmaq və s. kimi insani dəyərlərin dirilməsində çox böyük zəhmətlərini unutmaq olmaz. Ümumiyyətlə, bir kəsin öz müəllimini, tərbiyəçisini, valideynini və ona ürək yandıranları unutması məntiqə sığmazdır. Bu üzdən həzrət Əlidən(ə.s) nəql olunan bir hədisdə deyilir ki, Peyğəmbər(s) buyurub: أنَاوَعَلِيُّ أبَوَا هَذِه الأُمَّة....
"Mən və Əli İslam ümmətinin atasıyıq. Sizin boynunuzda atalıq haqqımız var. Öz atanızla pis rəftar edib onun üzünə ağ olmayın !”
İkinci: Acı və çətin günləri unutmaq olmaz, çünki yenə təkrar ola bilər. Yəni hər bir insan ötüb keçən bədbəxtçiliyini yada salmalıdır. Zəif və gücsüz bir halda kənara düşdüyü, azacıq dəyəri və qüdrəti olmadığı, bir şeyi başa düşə bilmədiyi və ayaqlar altına yıxılmış zəlil bir qul olan günlərini və s. yada salmalıdır.
İndi ki, qüdrətə çatıb, özünə görə dəyərli bir şəxsiyyət və düşüncə sahibi olubdur, bunların amillərini unutmamalıdır. Çünki əgər onlar olmasaydı, təkbaşına bütün bu bədbəxtçilikdən özünü xilas edə bilməzdi.
Deməli, bu üstünlük və dəyərlərin həmişə çoxalması üçün təşəkkür etməyi özümüzə vəzifə bilməliyik.
Görəsən, kimlərə təşəkkür etməliyik?
1-Bütün ne'mətlərin, məhəbbətlərin və şəfqətlərin başlanğıcı olan Allaha.
2-Allahın bəndələrinə məhəbbət qaynağı olan İslam peyğəmbərinə(s) və Əliyə (ə). Cəmiyyəti şeytanın mikroblarından və zəhərlərindən sağaltmaq üçün onların nə qədər fədakarlıqları olmuşdur.
3-Mə'sum İmamlara(ə). Çünki qəmli həyatları dövründə müxtəlif duaları və hədisləri ilə insan cəmiyyətinin ayılması üçün çox böyük tə'sirə malik olmuşlar.
4-Öz zamanımızın İmamına (ə). Çünki o, Allah dostlarının ümidi və onların xilaskarıdır. Yəni əgər onun kölgəsi bizim başımızın üzərində olmasa və bizim zəif qəlbimizi Allah təalaya tərəf yönəltməsə, əlimizdən heç bir iş gəlməz və heç bir nəticəyə çatmarıq.
5-Valideynlərimizə. Çünki göz qırpmadan öz canlarını və hər şeylərini bizdən ötrü əsirgəməmişlər.
6-Müəllimlərimizə, tərbiyəçilərimizə, yaxşı dostlarımıza, əməlisaleh həyat yoldaşlarımıza, ağıllı və Allaha itaətkar olan övladlarımıza və s.
Kitabın adı: Həzrət Fatimənin (ə) xütbəsi
Müəllif: Seyyid Həmid Fəttahi
Tərcümə edən: Hacı Tərlan Seyfullah
Admin: 3
Redaktor: 4
Sayt nəzarətçisi: 7
VİP: 1
İstifadəçi: 6677
Bu gün: 0
