Görəsən, bu təsirlər Peyğəmbərin (s.ə.s.) öpdüyü
bütün əşyalara aiddirmi?
Peyğəmbərin (s.ə.s.) Kərbəla türbətini öpməsi nəticəsində əmələ gələn
təsirləri araşdırmazadan əvvəl bu məsələ ilə əlaqəsi olan digər bir mətləbə
işarə etmək istəyirəm. Bu mətləb Peyğəmbərin (s.ə.s.) hər hansı bir əşyanı
öpməsi məsələsidir; belə ki oxucunun zehnində belə bir sual yarana bilər:
Peyğəmbər (s.ə.s.) həyatı boyu bir çox əşyaları qoxulayaraq öpmüşdür.
Bunlara misal olaraq, o həzrətin həyat yoldaşları, övladları, xüsusi ilə də
Həzrət Fatimeyi-Zəhranı (ə) nümunə gətirmək olar. Görəsən, bu əşyalar da Kərbəla türbəti kimi həmin təsirləri qazanmışdır, yoxsa məsələ yalnız
Kərbəla türbətinə aiddir?
Bəli, bu məsələ yalnız Kərbəla türbətinə aiddir. Səbəb isə ilahi əmrdir.
Allah həmin Qadir Tanrıdır ki, Məryəmə (s.ə) məkan və zaman
xüsusiyyətlərinin cəm olduğu yerdə qurumuş xurma ağacına təsir etməsinə
icazə vermişdir: "...sənin üçün təzə yığılmış xurma tökülsün.”
Deməli, Cəbrail (ə) zaman və məkanın fövqündən çıxış edib ilahi
əmrə tabe olaraq Peyğəmbərə (s.ə.s.) nazil olmuşdu. Həmin anda İmam
Hüseyn (ə) başını Peyğəmbərin (s.ə.s.) sinəsinə qoymuş, o isə onu
qoxulayaraq öpürdü. Belə bir məhəbbətlə dolu mühitdə, yəni bəşər
aləmində oxşarı tapılmayan bir fəzada qəlbləri parçalayan mənzərəyə kim
dözə bilər?
Lakin dünya fəcr ilə günəşin doğması arasındakı çox qısa bir zaman
fasiləsində bütün məxluqatın ağası olan Peyğəmbərin (s.ə.s.) balası
Hüseynin başına gələcək müsibətləri yaşadı. Sanki, Peyğəmbər (s.ə.s.)
balası Hüseynin (ə) bədəninə dəyən nizə, ox, qılınc və atların dırnağını hiss
edirdi.
Bir neçə anın ərzində Cəbrail (ə) risaləti ilahi əmrin vasitəsi ilə
peyğəmbərə çatdıraraq soruşur:
"Onu sevirsənmi?!” Təəccüblü sual və
cavab..! Nə sual verən, nə də cavab verən hadisələrdən qəflətdə idi.
Cavab vəhy xəzinəsindən, yəni Peyğəmbərin (s.ə.s.) qəlbindən gələn
"bəli!” səsi idi. Lakin həqiqətdə isə belə idi: Cəbrail (ə) Hüseynin (ə)
Peyğəmbərin (s.ə.s.) balası və reyhanəsi olmasını bilirdi. Həmçinin
Peyğəmbərin (s.ə.s.) ona olan məhəbbətinin dərəcəsindən də xəbərdar idi.
Lakin o, əmrə tabe olub risaləti daşıyaraq təhvil verdi və cavabı eşitmək
üçün gözlədi. Peyğəmbərə (s.ə.s.) gəlincə isə o Həzrət (s.ə.s.) bilirdi ki, Allahın dini üçün öz balasını qurban vermə vaxtı yetişmişdir. Lakin bu
hansı vaxt idi? Görəsən, qurbanlığın kəsilməsi, yoxsa qurbanlığın deyəcəyi
sözü eşitmə vaxtı?
Allah-taala Onun əmri ilə İsmaili qurban etməli olduğunu xəbər
verdiyi zaman İbrahimin (ə) öz oğlundan eşitdiyi cavabı Muhəmməd
peyğəmbərin də (s.ə.s.) öz balası Hüseyndən eşitməsini istəmişdi. İslam peyğəmbərinin (s.ə.s.) məqamı İbrahim peyğəmbərin (ə)
məqamından üstün olduğu üçün Peyğəmbər (s.ə.s.) cavabı eşitməli və
həmin cavab Cəbrailin (ə) vasitəsi ilə birbaşa nəql olunmalı idi.
Peyğəmbərlərin ağası (s.ə.s.) Həzrəti-Fatimənin (s.ə) balasından cavabı
gözləyirdi, necə ki İbrahim (ə) Hacərin balasından cavab gözləyirdi və
cavab da belə oldu: "... Ey ata! Sənə əmr ediləni yerinə yetir. Allahın istəyi
ilə məni səbirlilərdən görəcəksən!”
Burada göz yaşı cavabı qabaqladı! Amma kimin göz yaşı?! Hüseynin,
ya babası Peyğəmbərin, yoxsa Cəbrailin göz yaşı?! Heç bir fərqi yoxdur;
hər üçü buradadır və ağlayır... Həmçinin orada Kərbəla çölündə olacaqlar. İmam Hüseynin (ə) cavabı hər iki məkanda da eynidir. Lakin Fatimə
balasının vəziyyəti tam fərqlidir. Burada o, başını babası Peyğəmbərin
(s.ə.s.) sinəsinə qoymuşdur. Peyğəmbər (s.ə.s.) rəhmət əli ilə onun tellərini
sığallayır.
Orada isə... Onun başı Kərbəla torpağı üzərində olacaq... Susuz...
Yalnız... Qərib halda. Sanki qılınclar Peyğəmbərin (s.ə.s.) mübarək
barmaqlarının izi ilə onun başını sığallayacaq...
Burada Hüseynin (ə) bir gözü Peyğəmbərə (s.ə.s.), digər gözü isə
Cəbrailə (ə) baxırdı. Orada, Kərbəlada isə Hüseynin (ə) bir gözü əhli-əyalı,
bacılarına, digər gözü isə onların qatilləri və düşmənlərinə baxacaq. Burada o, fərəh içində idi, lakin orada isə vəziyyət həddən artıq
gərginləşdikdə gözlərini səmaya dikib belə buyuracaq:
"Ey mənim
Allahım! Sən ali məqam sahibisən! Əzəmətli qüdrət və şiddətli qüvvət
sahibisən, məxluqatdan ehtiyacsızsan. Böyük kibr sahibi, istədiyin hər bir şeyə qadirsən. Rəhmətin yaxın, vədən sadiq, nemətlərin bol, imtahanın
gözəl, dua edilən zaman yaxın, yaratdıqlarını əhatə edənsən. Sənə doğru
qayıdan bəndənin tövbəsini qəbul edənsən, istədiyin hər bir şeyə qadirsən.
Tələb etdiyini dərk edənsən. Sənə şükr edilən zaman təşəkkür edənsən,
Səni xatırlayanı xatırlayansan, ehtiyaclı halda Səni çağırıram və fəqir
olduğum halda Sənə rəğbətliyəm, qorxan halda Sənə pənah aparıram, kədər
halında ağlayıram, zəif olduğum üçün Səndən yardım diləyirəm, Sən mənə
kifayət edən halda Sənə təvəkkül edirəm!
Ey mənim Allahım, bizimlə qövmümüz arasında hökm et, həqiqətən,
onlar bizi aldatmışlar, köməksiz tərk etmişlər. Bizə xəyanət etmiş və bizi
qətlə yetirmişlər. Biz sənin Peyğəmbərinin itrəti və risalətə seçdiyin
həbibin Muhəmmədin (s.ə.s.) balaları və vəhyin əmanətdarlarıyıq. Bizim
bu işimiz üçün qurtuluş və çıxış yolu müəyyən et, ey Rəhimlilərin
Rəhimlisi!”
Bax, cavab budur, ey Allahın Peyğəmbəri..! O, dəyişməzdir,
baxmayaraq ki, zaman və məkana görə onun kəlmələri müxtəlifdir. Buna
görə də, İbrahim peyğəmbərin oğlu İsmaildən eşitdiyi cavab ilə İslam
Peyğəmbərinin öz balası Hüseyndən eşitdiyi cavab arasında böyük fərq
vardır.
"Allahın istəyi ilə məni səbirlilərdən görəcəksən!” cavabı ilə "Sənin
qəza-qədərinin müqabilində səbir edirəm, ey O Rəbb ki, ondan başqa ilah
yoxdur, ey yardım edənlərin yardımçısı. Mənim Səndən başqa Rəbbim və
Səndən başqa Məbudum yoxdur. Ey yardıma etiyacı olmayıb yardım edən, Sənin hökmünə səbir edirəm! Ey tükənməyib daim olan! Ey ölüləri
dirildən! Ey hər bir nəfsin kəsb etdiyini onun üçün yerinə yetirən! Mənimlə
onların arasında hökm et, ey hökm edənlərin ən xeyirlisi!”
Elə buna görə də, Hüseynə (ə) hələ onun dünyaya gəlməsindən əvvəl
Adəm (ə), Nuh (ə), İbrahim (ə), İsmail (ə), İsa (ə), Musa (ə) və bütün
peyğəmbərlər ağlamışlar.
Beləliklə, İmam Hüseyndən (ə) cavabı eşitdikdən sonra, Cəbrail (ə)
Hüseynin (ə) qətlə yetiriləcəyi və dəfn olunacağı türbəti gətirib
Peyğəmbərin qarşısına qoyur və o, öz növbəsində Allah-taalanın bu türbətə
bəxş etdiyi qeybi və vücudi-fiziki təsirlərə göz yaşları ilə möhür vurur.
Kitabın adı: İmam Hüseyn (ə) türbətinin qeybi təsirlərinin həqiqəti
Müəllif: Seyyid Nəbil Əl-Həsəni
Admin: 3
Redaktor: 4
Sayt nəzarətçisi: 7
VİP: 1
İstifadəçi: 6678
Bu gün: 0
