Dua zamanı Kərbəla türbətinin xüsusiyyəti
Allah-taala bu varlıq aləmində "üstünlük qanununa” əsasən, yaratdığı
məxluqatlar içərisində, istər mələklər, peyğəmbərlər, vəsilər, istərsə də
yer kürəsinin bəzi məkanları – Kərbəla, Məkkə, Mədinə, Küfə, Nəcəf və
Qüds arasında olsun – birini digərindən fəzilətli qərar vermişdir. Bu fəziləti
həmçinin zamana nisbətən də görmək olar. Belə ki Ramazan ayını, Qədr
gecəsini və bu kimi müəyyən zamanları digərlərinə nisbətdə üstün qərar
verərək fəzilətli etmişdir. Buna görə də aqil insanların nəzərində bu
məkanların və zamanların Allaha yaxınlaşmaq üçün vəsilə qərar verilməsi
heç bir problem doğurmur. Əgər bu və ya hər hansı bir yer Allah-taalanın
nəzərində üstün olmasaydı, onu digərlərinə fəzilətli qərar verməzdi. Bu
məzmuna dəlalət edən bir çox rəvayətlər vardır. Beləliklə, Kərbəla
torpağında duanın Allaha yaxınlaşmaq üçün xüsusi bir vasitə olması açıq
aşkar məlum olur. Məkanla dua arasındakı bu əlaqəni izah etmək üçün İmam Sadiqdən (ə) gələn rəvayəti təqdim edirik:
"Allah-taala Kərbəla
torpağını mələklər və möminlərin ziyarət məqamına çevirərək onun üçün
ali bərəkətlər müəyyən etmişdir. Belə ki əgər bir kəs bu torpaqda dayanıb
öz rəbbinə dua edərsə, Allah-taala onun bir duasına görə min dəfə dünya
mülkünü əta edər.”
İmam Sadiq (ə) nəfəsini dərərək yenə buyurdu: "Ey
Müfəzzəl, Yer kürəsi və Məkkə torpağı Kərbəla torpağı qarşısında fəxr
edən zaman Allah-taala Kəbəyə vəhy etdi: "Sakit ol, Kərbəla torpağı
qarşısında fəxr etmə!” Həqiqətən, Kərbəla torpağı Musanın (ə) ağac
vasitəsi ilə danışdığı mübarək torpaqdır. Həqiqətən, Kərbəla torpağı
Məryəmin (s.ə) İsanı (ə) dünyaya gətirdiyi torpaqdır. Kərbəla torpağındakı
Fərat çayı həmin çaydır ki, İmam Hüseynin (ə) mübarək başı orada
yuyuldu, həmçinin Məryəm (s.ə) İsanı (ə) dünyaya gətirdikdən sonra onu
orada yuyub, özü də qüsl etmişdir. Bu həmin torpaqdır ki, İslam Peyğəmbəri (s.ə.s.) oradan meraca getmişdir. Bizim Qaim zühur edənə
qədər Kərbəla torpağı şiələrimiz üçün xeyir və bərəkət məkanıdır.”
Bu hədis açıq-aşkar dua ilə Kərbəla torpağı arasındakı əlaqəyə işarə
edir. Həmçinin İslam Peyğəmbərindən (s.ə.s.) daxil olan hədis də Kərbəla
torpağında edilən duanın mövqeyinin bir sıra üstünlüklərini göstərir. Belə
ki, Tavus əl Yamani Abdullah ibn Abbasdan rəvayət nəql edərək belə
söyləyir.
Bir gün Peyğəmbərin hüzuruna daxil olduqda Həsəni onu
çiynində, Hüseyni isə qucağında gördüm. Peyğəmbər (s.ə.s.) onları
qoxulayıb öpərək belə deyirdi:
"Ey Allahım, bunlara dost olana dost,
düşmən olana düşmən ol!”
Sonra üzünü mənə tutaraq belə buyurdu: "Ey
ibn Abbas, sanki mən onun (Hüseynin) saqqalının öz qanına bulandığını
görürəm, fəryad edir, lakin heç kim onun səsinə cavab vermir, yardım
istəyir, lakin hec kim ona yardım etmir!”
(İbn Abbas) soruşdum: "Bu işi
kim görəcək, ey Allahın elçisi?”
Peyğəmbər (s.ə.s.) buyurdu: "Mənim
ümmmətimin ən pis insanları; Allah mənim şəfaətimi onlara nəsib etməsin!
Ey İbn Abbas, kim onun haqqını tanıyaraq ziyarət etsə, yüz həcc və min
ümrə savabı onun üçün yazılar. Onu ziyarət edən məni ziyarət etmiş kimidir və hər kim məni ziyarət etsə, sanki Allahı ziyarət etmişdir.
Ziyarətçinin Allah üzərindəki haqqı onu Cəhənnəmlə
cəzalandırmamasıdır. Agah ol, dua, onun qübbəsi altında qəbul olar, şəfa
isə onun türbəti ilə tamamlanar. İmamlar onun nəslindən doğular”.
(İbn
Abbas) soruşdum: "Ey Allahın elçisi, səndən sonra neçə imam olacaq?”
Peyğəmbər (s.ə.s.) buyurdu: "İmamların sayı, İsanın həvariləri, Musanın
əsbatı (nəvələri) və Bəni-İsrailin seçilmişlərinin sayı qədərdir.”
(İbn
Abbas) soruşdum: Ey Allahın elçisi, onların sayı nə qədər olub?
Peyğəmbər (s.ə.s.) buyurdu: "Onlar on iki nəfər olmuşlar və məndən sonra
imamların sayı on ikidir. Onların birincisi Əli ibn Əbutalib, ondan sonra isə
mənim iki nəvəm – Həsən və Hüseyn olacaq. Hüseyn həyatını başa vurduqdan sonra onun oğlu Əli, ondan sonra Əlinin oğlu Muhəmməd,
ondan sonra Muhəmmədin oğlu Cəfər, ondan sonra Cəfərin oğlu Musa,
ondan sonra Musanın oğlu Əli, ondan sonra Əlinin oğlu Muhəmməd,
ondan sonra Muhəmmədin oğlu Əli, ondan sonra Əlinin oğlu Həsən
olacaq. Həsən ömrünü başa vurduqdan sonra oğlu Höccət imam olacaq.”
(İbn Abbas) dedim: "Ey Allahın elçisi bu adları əvvəllər eşitməmişəm.”
Peyğəmbər (s.ə.s.) buyurdu: "Ey ibn Abbas, onlar məndən sonra imam
olacaqlar, hətta onlara zülm olunsa belə. Onlar ümmətin seçilmişləri,
məsum və əmanətdarlarıdır. Ey İbn Abbas, hər kim Qiyamət günündə
onların haqqını tanıyaraq gələrsə, əlindən tutub Cənnətə daxil edərəm. Ey İbn Abbas, hər kim onları və ya onlardan hər hansı birini inkar etsə, sanki,
məni inkar edib qəbul etməmişdir. Hər kim məni inkar edib qəbul etməsə,
sanki, Allahı inkar edib qəbul etməmişdir. Ey İbn Abbas, tezliklə insanlar
sağa və sola meyil edəcəklər, belə olan halda Əli və onun tərəfdarlarının
arxası ilə get. Həqiqətən, Əli haqq ilədir və haqq da Əli ilədir, onlar Kövsər
hovuzuna gələnə qədər biri-birindən ayrılmazlar. Ey ibn Abbas, onların
vilayəti mənim vilayətim, mənim vilayətim isə Allahın vilayətidir. Onlarla
müharibə mənimlə müharibə etməkdir, mənimlə müharibə edən Allahla
müharibə etmiş kimidir. Onlarla sülh mənimlə sülh etməkdir və mənimlə
sülh etmək Allahla sülh etmək kimidir.”Peyğəmbər (s.ə.s.) sözünə davam edərək buyurdu: "Onlar sözləri ilə
Allahın nurunu (Onun dinini və kitabını) söndürmək istəyirlər, halbuki
Allah kafirlərə xoş gəlməsə belə, yalnız Öz nurunu (hətta zamanın
keçməsi, ağılların kamilləşməsi və bütün aləmin islahedicisinin gəlməsi ilə
olsa da) kamilləşdirmək istəyir.”
Kitabın adı: İmam Hüseyn (ə) türbətinin qeybi təsirlərinin həqiqəti
Müəllif: Seyyid Nəbil Əl-Həsəni