Əsgərim
Qollar üstə şəhid olan Əsgərim,
Dil-dodağı təşnəli, nuru solan Əsgərim.
Düşmən aman vermədi, bir imana gəlmədi,
Körpələrin halını, əhvalını bilmədi.
Tifil əsgər göz açıb, ağlayıb heç gülmədi,
Hərmələ ləin niyə, nişan olan Əsgərim?
Qolları üstə Hüseyn, şəhid olan Əsgərim.
Gilə-yaş gözlərindən vərəqlərə car olur,
\Deyən dilim qəlbimə həmdəmli bir yar olur.
Gül niyyətli ürəkdə, niyə tikan xar olur,
Susuz, nitqi tutulan, halsız qalan Əsgərim,
Qolları üstə Hüseyn, şəhid olan Əsgərim.
Ey analar, atalar körpəsi əldən gedən,
Adı düşməz dilinizdən, nöhəsi qəlbdən gedən,
Qəlb-iman ənbəri-müşkdir güldən gedən,
Əhli-iman qəlbinə mehri dolan Əsgərim,
Qolları üstə Hüseyn, şəhid olan Əsgərim.
Verib Hüseyn canını, verib xanimanını,
Keçib əhli-əyaldan, verib gül qurbanını,
Məqsədi qorumaqdır dinini, imanını,
Şəhid getməkçün səndən doğulan Əsgərim,
Qolları üstə Hüseyn, şəhid olan Əsgərim
Bir gözümüz gülərsə, bir gözümüz ağlayar,
Yetmiş iki şəhidə qəlbdən iman bağlayar.
Bu əzalar hər zaman din-imanı saxlayar,
İslam azad qalmağa, can verdi, can Əsgərim,
Dil-dodağı təşnəli, nuru solan Əsgərim!
Qolları üstə Hüseyn, şəhid olan Əsgərim.
Mənbə; " Mərsiyələr Qəsidələr Qəzəllər" kitabı
Rafiq Məhərrəmli