1. Təxəllinin hökmləri
1. Qibləyə tərəf dayanmamaq.
Təxəlli vaxtı insan üzü və ya arxası qibləyə tərəf dayanmamalıdır.
2. Övrəti (ayıb yerləri) örtmək.
Təxəlli halında, həmçinin digər vaxtlarda insan öz övrətini həyat yoldaşından başqa hamıdan -istər qadın olsun, istərsə də kişi, istər məhrəm olsun, istərsə də naməhrəm- hətta yaxşı ilə pisi ayırd edə bilən uşaqdan örtməlidir. Amma ər-arvada övrətlərini bir-birindən örtmək vacib deyil.
3. Təxəlli zamanı məkruh olan işlər:
- 1. Ayaq üstə bövl etmək
- 2. Bərk torpağa və heyvanların yuvasına bövl etmək
- 3. Suya, xüsusilə də axarı olmayan suya bövl etmək
- 4. Bövl və ğaiti saxlamaq
- 5. Camaatın gediş-gəliş yollarına və meyvə ağaclarının altında təxəlli etmək
2. İstibra
1. Əgər kişilər bövl etdikdən sonra "istibra” adlanan əməli yerinə yetirsələr və bu əməldən sonra bövl məxrəcindən xaric olan rütubətin bövl, yoxsa başqa bir rütubət olduğunu bilməsələr, bu rütubət pak rütubət hökmündədir və araşdırma lazım deyil.
2. İstibra vacib deyildir, hətta əgər zərəri olsa haramdır. Məsələn, bövl məxrəcində yara olduğu üçün istibra zamanı qanasa və yaranın sağalmasını təxirə salsa, istibra etmək haramdır. Əlbəttə, əgər hər kim istibra etməsə və bövl etdikdən sonra ondan xaric olan rütubətin bövl olub-olmadığını ayırd edə bilməsə, bu rütubət bövl hökmündədir.
3. Ən yaxşı istibra üsulu belədir: bövl edib qurtardıqdan sonra əgər ğaitin məxrəci (xaric olduğu yer) napakdırsa, əvvəlcə ora paklanır. Sonra sol əlin orta barmağı ğaitin məxrəcindən cinsiyyətin dibinə qədər üç dəfə çəkilir. Daha sonra baş barmağı cinsiyyətin üstünə və baş barmağın yanındakı barmağı onun altına qoyub üç dəfə cinsiyyətin ucuna qədər çəkilir. Axırda üç dəfə cinsiyyətin baş hissəsi sıxılır.
4. Ğaitin məxrəcini pakladıqdan əvvəl və ya sonra edilən istibranın qaydası arasında heç bir fərq yoxdur.
5. Əgər bir şəxs bövl edib qurtardıqdan sonra istibra etsə və dəstəmaz alandan sonra ondan bövl, yoxsa məni olduğuna şübhə etdiyi bir rütubət xaric olsa, bu şəxsə vacibdir ki, hədəsdən paklandığına əmin olması üçün həm qüsl etsin (cənabət qüslü), həm də dəstəmaz alsın.
Diqqət:
İnsandan xaric olan rütubətlərin növləri
- 1. Vəzy, məni xaric olduqdan sonra insandan xaric olan rütubətdir.
- 2. Vədy, bövl xaric olduqdan sonra insandan xaric olan rütubətdir.
- 3. Məzy, ər-arvad mazaqlaşandan sonra xaric olan rütubətdir.
Qeyd olunan bu rütubətlərin hamısı pakdır və təharətin pozul-masına bais olmur.
3. İstinca (bövl və ğaitin məxrəcinin paklanması)
1. Bövlün məxrəcini paklamağın qaydası.
- 1) Bövlün məxrəci sudan başqa şeylə paklanmaz.
- 2) Bövlün məxrəci ehtiyati-vacibə görə iki dəfə yuyulmaqla paklanır.
2. Ğaitin məxrəcini paklamağın qaydası.
- 1) Ğaitin məxrəcini iki cür paklamaq olar:
I. Nəcasət aradan gedənədək su ilə yuyulur. Nəcasət aradan getdikdən sonra yenidən yumaq lazım deyil.
II. Üç tikə daş, ya üç tikə pak parça və ya s. bu kimi şeylərlə nəcasət təmizlənir. Əgər üç tikə ilə nəcasət təmizlənməzsə, tamamilə pak olanadək əlavə tikələrlə təmizlənir. Üç tikə əvəzinə bir tikə daş və ya parçanın üç yerindən istifadə etmək olar.
- 2) Ğaitin məxrəci üç halda yalnız su ilə paklanır və daş və s. şeylərlə paklamaq olmaz:
I. Ğaitlə birgə qan kimi digər bir nəcasət xaric olduqda
II. Ğaitin məxrəci kənardan başqa bir nəcasətə bulaşdıqda
III. Ğaitin məxrəci adi haldan artıq olaraq nəcasətə bulaşdıqda (Başqa sözlə desək, ğaitin məxrəcindən əlavə digər yerlər də nəcasətə bulaşdıqda)