Övlad istəmək haqqında oxunan duaların fəzilətləri

Peyğəmbər (s) buyurur:"Yaxşı övlad cənnət güllərindən biridir və insanın xoşbəxtliyi gözəl və ədəbli övladlar böyüdüb ərsəyə çatdırmaqdır. Övladlarınızın sayını çox edin, mən öz ümmətimin çoxluğu ilə axirətdə fəxr edəcəyəm.

Əli (ə)-dan nəql olunmuş hədisdə deyilir:Övlad hər hansı bir xəstəliyə tutularsa onun valideyinlərinin günahı bağışlanar.

Başqa bir rəvayətdə deyilir:Həzrəti Məhəmmədə iman gətirmiş sadiq möminlərin övladları ağladıqları zaman onların çəkdikləri nalə səkkiz il "La İlahə İlləlah” zikrinə çevrilər, səkkiz il keçdikdən sonra onların nalə səsləri valideynləri üçün rəhmətə çevrilər. Həddi-buluğa yetişdikdən sonra valideynləri onların savabları ilə şərik olarlar, günahları ilə isə yox.

Peyğəmbər (s)-dan nəql olunmuş hədisdə deyilir:"Həzrəti İsa bir qəbrin kənarından ötüb keçdiyi zaman oradan qorxunc nalə səsləri eşidir. Bir il sonra yolu yenə həmən qəbrin kənarından düşür, amma bu dəfə heç bir səs eşitməyir. Bunun səbəbini Allah-təaladan soruşur: Belə bir vəhy gəlir "Onun sahibi cəhənnəm əhlindən idi və sənin eşitdiyin o səs ona verilən əzab və işgəncənin səsi idi. Bu il isə onun övladlarından biri həddi-buluğa yetişmiş və bir yol düzəltmiş və imkansızlara əl tutmuşdur. Biz də onu övladının bu xeyirxah işinə görə görə bağışladıq. "Hər bir övlad valdeynin Allah üçün qoyub getdiyi bir mirasdır. Ona daim ibadət etməli, xeyirli işlər görməyə tələsməlidir.”

Başqa bir hədisdə deyilir: "Allah-təala qızlara,oğlanlardan daha mehribandır. Özünüzə məhrəm olan qadın qohumlarından birini sevindirən şəxsə də Allah-təala axirətdə böyük şadlıq nəsib edər.”

İslamdan əvvəlki dövrlərdə (cahiliyyət dövründə ) ərəblər qız uşaqlarına çox zərər verici bir varlıq kimi baxardılar.Qız uşaqları dünyaya gəldikdə onları diri-diri torpağa basdırardılar.Ərəblər islam dinini qəbul etdikdən sonra belə bu tərz-təfəkkür hələ də onların bəzilərində qalmaqda idi. Bu barədə bir neçə Quran ayəsi nazil oldu və onlara bəyan edildi ki, qız uşaqları heç də şərr deyildir və onların ruzisi Allah tərəfindən təmin ediləcəkdir. Buna əlavə olaraq Peyğəmbər (s)-dan bir neçə hədis nəql edildi və onların bu səhv düşüncələrinin qarşısı alındı.

Hədislərdən birində deyilir:"Qız övladı olan valideynin üzərinə ağır yük düşmüşdür. Mömin qardaşlarımızın bir neçə qız uşağı olarsa ona maddi yardım göstərmək sizin müsəlmanlıq vəzifələrinizdən birinə çevrilir. Üç bacıya və ya üç qız uşağına pul xərcləyən və ya bir şey hədiyyə edən müsəlmana cənnət vacib olar.

İmam Sadiq (ə)-dan nəql olunmuş hədisdə deyilir:"Övladlarınızın tez və sağlam boya-başa çatması üçün bu duanı oxuyun.”

(Allahummə la təzərni fərdən və əntə xəyrul-varisiynə vəhidən vəhəşən fəyəqsuru şukri ən təfəkkuri bəl həb li aqibətə sidqin zukurən və inasən anəsu bihim minəl vəhdəti vəəskunu iləyhim minəl-vəhdəti və əşkurukə ində təmamin neməti ya vəhhabu ya əzimu ya muəzzim summəə ətini fi kulli afiyətin şukrən hətta tubliğuni minha rizvanəkə fi sidqil-hədisi və ədail-əmanəti və vəfain bil-əhdi)

Övlad arzuladığınız zaman isə iki rükət namaz qılın və səcdələri uzadın və səcdəyə getdiyiniz zaman bu ayəni oxuyun.

(Allahummə inni əsəlukə bima səələkə bihi zəkəriyya rəbbi la təzərni fərdən və əntə xəyrul-varisin.Allahummə həb li min lədunkə zurriyyətən təyyibətən innəkə səmiyuddua. Allahummə bismikə istəhləltuha və fi əmanatikə əxəztuha fə in qəzəytə fi rəhiməha vələdən fəcəlhu ğulamən mubarəkən zəkiyyən vəla təcəl lişşəytani fiyhi şərəkən vəla nəsiybən).

Övladı olmayan şəxslərə isə hər gecə yüz dəfə istifar "Əstəğfirullahi ətubu və iləyh” etmək tövsiyə edilmişdir.

Övlad istəmək üçün başqa bir Quran ayəsi:

(Vəzənnuni izzəhəbə muğazibən fəzənnə ən lən nəqdirə ələyhi fənada fizzulumati ən la ilahə illa əntə subhanəkə inni kuntu minəzzalimin fəstəcəbna ləhu vənəccəynahu minəl ğəmmi və kəzalikə nuncil-muminin və zəkəriyya iz nada rəbbəhu rəbbi la təzərni fərdən və əntə xəyrul-varisin).

İmam Sadiq (ə)-dan nəql olunmuş hədisdə deyilir: "Zövcənizin hamiləlik dövründən dörd ay keçdikdən sonra əgər oğlan uşağı və adını Məhəmməd qoymaq istəsəniz hər ikiniz qibləyə tərəf oturub Ayətəl-kürsi oxuyun. Sonra əlini böyrünə qoyub de "Allahummə inni qəd səmməytuhu Muhəmmədən" (Ey mənim Allahım mən onun adını Məhəmməd qoydum).