Qonağa hörmət

İnsan gərək qonağa hörmət etsin. Qonağa hörmət edən insanlar Allah yanında uca məqama çatmağa nail olmuşlar.

قال رسول الله(ص): من كان يؤمن باالله واليوم الاخر فليكرم ضيفه

Həzrət Peyğəmbər(s) buyurur: “Allaha və axirətə iman gətirənlər qonağa hörmət etməlidir.”

قال رسول الله(ص): كل بيت لا يدخل فيه ضيف لا يدخل الملائكة

Başqa bir hədisdə belə buyurur: Qonağı olmayan evə mələklər daxil olmaz”

Ümumiyyətlə məlaikələrin daxil olmadığı yerləri Peyğəmbər(s) və imamlar hədislərdə buyurmuşlar.

Həzrət Peyğəmbər(s) buyurmuşdur: “İt olan evə mələklər daxil olmaz.”

Mərhum Nəraqi öz kitabında bu hədisi belə açıqlayır. Evdən məqsəd insanın qəlbi, itdən məqsəd isə günahlardır. Yəni günah olan qəlbdə Allah məhəbbəti olmaz.

Bir çox hədis və rəvayətlərdə vardır ki, günah və hicabsız qadın olan yerdə mələk olmaz.

Həzrət İbrahimi(ə) mancanağa qoyub odun içinə atmaq istədikdə mancanaq işləmədi. Nəmrudun adamları nə qədər çalışdılarsa mancanaq işləmədi ki, işləmədi. Şeytan qoca bir kişi şəklinə girib Nəmrudun yanına gəldi və dedi: Bilirsənmi mancanaq niyə işləmir? Nəmrud: Bilmirəm. Şeytan: Çünki mələklər İbrahimlə(ə) söhbət edirlər. Mələklərin orada olmasına görə mancanaq işləmir və nə qədər mələklər oradadılar mancanaq işləməyəcək. Nəmrud: Bunun çarəsi nədir? Şeytan: Gedin bir qadın gətirin başını mancanağın yanında açsın. Çünki, mələklər hicabsız qadın olan yerdə qalmırlar.

Nəmrudun adamları hər hansı qadına yaxınlaşıb bu təklifi ona dedikdə heç kəs razı olmadı. Bir nəfər pozğun qadına təklif etdilər. O qadın dedi: Mənim günahlarım özümə bəsdir və mən bu günahı heç vaxt etmərəm. Nəmrudun adamları axırda bir qadın tapıb gətirdilər. O qadın mancanağın yanında başını açan kimi mələklər uçub getdilər və mancanaq işləməyə başladı.

Buna əsasən də bir çox hədis və rəvayətlərdə vardır ki, hicabsız qadın olan evlərə mələklər daxil olmaz.

Mələklərin daxil olmadığı yerlərdən biri də yuxarıda qeyd etdiyimiz kimi qonağsız evdir. Qonağı olmayan evə mələk daxil olmur.

Bir gün həzrət Əli(ə)-ı qəmgin gördülər. Onun qəmgin olmasını soruşduqda o həzrət buyurdu: Mən ona görə qəmginəm ki, düz bir həftədir bizə qonaq gəlmir.

İslamda insanın evə qonaq dəvət etməsi bəyənilmiş əməllərdən biridir. Lakin qonaq qəbul etməyin də şərti vardır. O da budur ki, qonağı Allaha xatir qəbul edəsən. Əgər Allaha xatir istəmirsənsə qəbul etmə. Yəni insanın nə vaxtsa bir şəxsə işi düşəcək deyə onun üçün evində qonaqlıq etmək və onu evə qonaq çağırmaq Allaha xatir olan əməl sayılmır. Bu iş sadəcə olaraq insanın sözünün onun yanında keçməsi üçün edilən bir əməldir. Və bu əməl düzgün deyildir.

قال رسول الله(ص): اضف بطعامك من تحب فى الله

Həzrət Peyğəmbər(s) buyurur: “Yalnız Allaha görə sevdiyin şəxsə qonaqlıq ver.”

Hədislərdə vardır ki, hətta birinin evinə qonaq getmək istədikdə, elə şəxsin evinə gedin ki, o da sizi Allaha xatir istəsin.

Kitabın adı: İmam Hüseyn (ə) məktəbi