Gətiribdir
Mənəmlər söyləyən qalıbdır mənsiz,
İndi lal uzanıb olub önəmsiz.
Bir gün yolum düşdü qəbiristanlığa,
Gördüm hərə bircə can gətiribdir.
Baxıb təəccübləndim bu viranlığa,
Bir kimsə nə şöhrət-şan gətiribdir.
Hamı ağ kəfəndə tamam sərasər,
Bunlara diqqət et, oyan ay bəşər!
Tükənməz dövləti olsa da əgər,
Nə sultan, nə də ki, xan gətiribdir.
Mənəmlər söyləyən qalıbdır mənsiz,
İndi lal uzanıb olub önəmsiz.
Çoxu zülm eyləyib olub kərəmsiz,
Özüylə bəs deyin qan gətiribdir.
Haramdan yığıbdır varı-dövləti,
Çapıb talayıbdır məzlum milləti.
Qazancı olubdur xalqın nifrəti,
Özüylə çox pis ad-san gətiribdir.
Mən də günahkaram əfv et, İlahi!
Sənsən günahkarın təkcə pәnahı.
Ümid yerimizdir Rəbbin dərgahı,
Səməndər günahkar can gətiribdir.
Müəllif: Səməndər Qarabağlı