Zərər (şeir)
Fiqhdə bir qayda var "Zirar" qaydası,
Nədir bu qaydanın görən mənası?
Mənası budur ki, heç bir zaman mən,
Özümə, özgəyə zərər verməyəm.
Hər bir zərərli şey olubdur yasaq,
Dinin buyruğuna biz qulaq asaq.
Zərər eyləyərsə insan üçün su,
Gərək namaz üçün almasın vuzu.
Təyəmmüm etməli bu zaman insan,
Çünki onun üçün su edir ziyan.
Bir kəsin suyuna qatsam mən zəhər,
Onunçün bu işim deyilmi zərər?
Şübhəsiz zərərdir, bu iş haramdır,
Məgər şübhəyə bir dəlilmi vardır?
Müctehid buyurur siqaret əgər,
İnsan bədəninə edərsə zərər,
Bu işi həkim də təsdiq edərsə,
Hətta başqasına ziyan yetirsə.
Haramdır, cəzası vardır bu işin,
Haramdan uzaqlaş, ay mömin düşün!
Təyəmmümlə bunun nədir ki, fərqi?
Hər iki fətvada meyar zərərdir.
Havanı su kimi etsən zəhərli,
O da insan üçün günahdı, bəli.
Kimsə fikirləşsə sözüm qiyasdı,
Şeytanın sözünə o qulaq asdı.
Qiyas haram deyil, səbəb bilinsə,
Taparsan diqqətlə baxsan hədisə.
"Әl xamru həramun" söyləmiş Nəbi,
Məstlikdir buyurmuş onun səbəbi.
Bütün məst edən şey haramdır demək,
İlahi, bəndənə eyləynən kömək!
Səməndər uymasın bir an nəfsinə,
Layiqli bir bəndə olsun Rəbbinə.
Müəllif: Səməndər Qarabağlı