Çətinliklər güc mənbəyidir

Yüksək bir qalaya yalnız burma pilləkənlə qalxmaq olar. Frensis Bekon
Necə deyərlər, çətinliklər bizləri möhkəmlədər.Onların səbəbilə insan daha güclü olar. Lakin bir şərtlə ki, o çətinliklər qarşısında insan geri çəkilmədən irəliyə doğru addımlayaraq çətinlikləri aşsın. Çətinlik üzərindən keçdikcə, insanın ruhunda olan gizli potensial qüvvələr işə düşər, psixikası daha da möhkəmlənər. Ağır şəraitdən çıxmış insan həyatın enişinə-yoxuşuna nisbətdə daha dözümlü olar. Çətinliyə düzgün prizmadan baxılarsa, o, insanı müdrikləşdirər.
Diqqət etmisinizsə, eyni cinsdən olan, lakin müxtəlif mühitlərdə bitən ağaclar bir-birindən tamamilə fərqlənir. Sərt iqlim şəraitində bitən ağac çətin təbiət şəraiti ilə daim mübarizədə olduğundan daha möhkəm olar, kökləri yaşaması üçün zəruri olan su və mineral maddələr əldə etmək səbəbilə yerin daha dərin qatlarına qədər işləyər. Münbit, mülayim iqlimdə və ev şəraitində bitən ağac isə daha zəif kök sisteminə və sərt iqlimə dözmək cəhətindən daha zəif gövdəyə malik olar. Bəzən də soyuq havada qərar tapdığından məhv olub gedər. Bəli, mümkündür ki, münbit və bol sulu mühitdə bitən ağac zahirən daha qollu-budaqlı, enli gövdəli görsənsin, lakin bu, aldadıcı olan zahirdən başqa, bir şey deyildir. Kiçik bir hava dəyişməsi qarşısında tez bir zamanda quruyacaq, böyük gövdəsi də məhv olacaqdır. Elə bu səbəbdən Həzrət Əli demişdir: Quraq bir vadinin tənha ağacı yaşıl çəmənliyin ağacından daha möhkəm olur.
Bu nəzərdən baxdıqda çətinliklər idmançıları möhkəmləndirən məşqlərə bənzəyər. Məşqlərdə iştirak edən idmançılar yarış zamanı daha müvəffəq olarlar. Eyni zamanda, ağır fiziki təlim görmüş insanların bədənləri möhkəm, xəstəliklər qarşısında imunitetləri daha çox olar. Nəticədə belə insanlar həyatda fiziki və psixoloji təsirlərə rahatlıqla tab gətirə bilərlər. Çətinliklər də eyni xüsusiyyətə malikdir. Onlar da insanı mənəvi cəhətdən möhkəmləndirər və onun güclü və sağlam psixikaya, sarsılmaz iradəyə malik olmasına səbəb olar. Belə insan ətraf mühitin təsirlərini, müxtəlif çətin həyat şəraitlərini asanlıqla aşar. Çətinlik görməyən, naz-nemət içində böyüyən, “dibçək bitkisi” kimi olan insanlar isə öz rahat mühitlərini tərk edən kimi cüzi problem qarşısında güclü ruhi zərbə alaraq, elə ilk çətinlikdən geri çəkilərlər. Çalışmaq lazımdır ki, çətinlik və həyat probleminə idman zalında edilən məşq kimi baxasan. Belə olsa, çətinliklər insan üçün maraqlı bir oyuna çevriləcəkdir.

Kitabın adı: Çətin olsa da, həyat davam edir
Müəllif: Rövşən Abdullaoğlu