"Ey iman gətirənlər, sizdən əvvəlkilərə yazıldığı kimi sizə də oruc yazıldı.”

      Oruc dedikdə Allah-taala tərəfindən verilən qərar nəzərdə tutulur. Belə ki, bəndə ilə Allah arasında çox möhkəm əlaqə qurulsun. Buna görə də sözə "Ey iman gətirənlər” deyə başlanılır və bəndələri Allah-taalanın kəlamına qulaq asmağa hazırlaşdırır. Həzrət İmam Cəfər Sadiq əleyhissalam buyurur: Bu dəvətin ləzzəti və mənəvi dəyəri oruc tutmağın çətinliyini aradan aparır.

      Oruc sizdən qabaqkı ümmətlərə də yazılmışdır buyuruğu ilə orucun çətinliyini aradan götürmək istəyir. Baxmayaraq ki, həqiqətən də İslamdan öncəki ümmətlər istər yəhudilər olsun, istərsə də xristianlar öz kitabları və qayda-qanunlarına uyğun oruc tutmuşlar və indiki zamanda da tuturlar. Əldə olan Tövrat və İncildən Həzrət Musa əleyhissalamın "Əhd-peyman lövhələri”-ni almazdan öncə qırx gün oruc tutaraq özünü hazırlaşdırdığı, o cümlədən Həzrət İsa əleyhissalamın da qırx gün oruc tutmaqla həvarilərinə təqva dərsi öyrətməyə çalışdığı anlaşılır.

Ləəlləkum təttəqun:

      "Ola bilsin təqvalı olasınız.”-cümləsi oruc tutmağın ən mühüm fəlsəfəsini açıqlayır. Əgər faizlə nəzərə alsaq tam qətiyyətlə deyə bilərik ki, orucun fəlsəfəsinin 99 faizi təqvalı olmaqdır. Bir faizdə isə başqa fəlsəfələrin hamısı müştərəkdirlər. Habelə demək olar ki, bütün dinlərin, xüsusilə də İslam dinin əsas dəvəti insanları təqvalı olmağa, pərhizkarlığa və pak yaşamağa çağırışdır. Allah-taala buyurur:

      "Barəsində heç bir şübhə olmayan bu uca məqamlı kitab pərhizkarlar üçün hidayət mənbəyidir.” (Bəqərə surəsi, ayə 2).

Sual: Bəs pərhizkarlar kimlərdir? Quran buyurur: "Qeybə inanan, namaz qılan və ruzi olaraq verdiklərimizdən infaq edən kəslərdir.”Habelə: "Sənə nazil edilən və səndən əvvəl nazil edilənlərə imanları və axirət gününə yəqinləri olan kəslər.” (Bəqərə surəsi, ayə 3 və 4)

      Təqvalıların son gündə səadətlə yaşayacaqları barədə buyurur: "Həqiqətən təqvalılar cənnətlər, bağlar, axar çaylar, daimi rifah və aydınlıq içində olacaqlar. Kamal və qüdrət sahibi olan hökmdarın yanında, doğruluq məqamında.” (Qəmər surəsi, ayə 54)

      "Həqiqətən təqvalılar əmin-amanlıq yerdə olacaqlar, bağların və çeşmələrin arasında.” (Duxan surəsi, ayə 52)

Deməliyik ki, Qurani-Kərimin-ey müsəlmanlar, təqvalı olun, Allahdan qorxun, pərhizkar olmağa çalışın. Həqiqətən Cənnətin qapıları təqvalıların üzünə açıqdır.-mesajı bu kitab boyunca təkrarlanır. Qurani-Kərimdə təqva kəlməsi 200 dəfədən artıq təkrar olunur. Belə ki, buyurur:

      "Ey iman gətirənlər, Allahdan qorxun! Hər kəs (özünün) sabahı üçün qabaqcadan nə göndərdiyinə nəzər salmalıdır. Allahdan qorxun ki, Allah etdiklərinizdən xəbərdardır.” (Həşr surəsi, ayə 18)

      Bu ayədə Allah-taaladan qorxmaq və təqvalı olmaq kəlməsi iki dəfə təkrarlanıb. Yəni ey iman gətirənlər təqvalı olun, özünüzü qoruyun. Hesaba çəkilmənizdən öncə təqvalı olun.

Kitabın adı: Oruc