Ağlaram səndən sora qardaş, gözüm qan ağlaram
Ağlaram səndən sora qardaş, gözüm qan ağlaram,
Yoxdu ətrafında kimsə, çünki pünhan ağlaram.
Qardaşım, etdin vəsiyyət ağlama məndən sora,
Qalmadı bir yaru-yavər ki, mənim halım sora,
Dözmüşəm hicrana neylim az qala qəlbim dura,
Eylərəm xəlvət məkani ahu-əfğan ağlaram.
Qardaşı ölmüş xanımlar ağlayar, fəryad edər,
Dərdinə həmdərd olar, həmsayəsi imdad edər,
Qalmışam tənha qəmimlə, kim məni bir yad edər,
Vermişəm yetmiş iki hər yaşda qurban, ağlaram.
İstərəm fəryad edim məndə ürəkdən ağlıyam,
Faş edib bu dərdimi canlar, ürəklərdağlıyam,
Yas tutub ey şiəyan, məndə qəralər bağlıyam,
Neyləyim mən binəva yox əldə imkan, ağlaram.
Ağlamam mən oğlu ölmüş çarəsiz madər kimi,
Ağlaram qardaşı ölmüş qəhrəman xahər kimi,
Yas tutub məndə Hüseynə (ə) ağlaram yavər kimi,
Olmusuz Zeynəb misal, sizlərlə suzan ağlaram.
Durmuşam düşmən önündə qəlbi-dağlı dağ kimi,
Qardaşım Əbbasidür, mən əsmərəm yarpaq kimi,
Saplaram haqq sözlərim düşmənlərə mizraq kimi,
Gör necə sapmış yolundan bunca insan, ağlaram.
Ey cəhalət dəstəsi, bir fikr edin kimdü ölən?!
Göz yaşıyla kimdü bu nurun boğazından öpən?!
Kimdü Cənnətdə şəbabət-seyyidi, varmı bilən?!
Qəflətindən yandırar bu qövmi niran, ağlaram.
Heyfi cahillik üzündən görmədüz bu rəhməti,
Uydunuz dəhri-fənayə, verdüz əldən fürsəti,
İzzəti qoyduz kənarə, seçdiniz siz zilləti,
Zülm ilə qətlə yetirdüz canlı Quran, ağlaram.
Ağlamam Ya Rəbb, əgər aşiq yetir öz yarına,
Qəmli dünyadən köçür cənnətdəki gülzarına,
Ağlaram Süfyanə uymuş bihəya hüzzarına,
Cəddimin bu ümmətində yoxdur iman, ağlaram.
Akifa, sən yaz anan Zeynəb (s.ə) dilindən aşikar,
Ayrılıq gər olmasaydı etməz idik ahu-zar,
Qisseyi - Kərbübəlaylə daim etdik iftixar,
Çox təəssüf ki, yenə var eyni nadan, ağlaram.