Şəban ayı həzrəti Rəsuli-Əkrəmə mənsub olmaqla çox şərəfli bir aydır və bu ayın bir çox fəzilətləri  vardır ki, fəqət biz onlardan çox az və seçilmiş hissələrini nəzərinizə çatdırmaq istəyirik:

Həzrət Rəsul (s) bu ayı oruc tutar və onu Ramazan ayının orucu ilə birləşdirərmiş. Və buyurmuşdur ki: "Hər kim şəban ayının heç olmasa bir gününü oruc tutsa, behişt ona vacib olar”.

İmam Sadiq (ə)-dən rəvayətdir: Elə ki, şəban ayı varid oldu, Həzrət imam Zeynul-Abidin (ə) öz əshablarını cəm edərək buyurardı: "Ey mənim əshablarım, bilin ki, bu şəban ayıdır və cəddim Həzrət Rəsul (s) buyurmuşdur ki, şəban –mənim ayımdır və siz Allaha yaxın olmaq və Peyğəmbərin hörmətini qazanmaq naminə bu ay oruc tutun.” And verirəm o Allahın haqqına ki, mən Əliyyibni Hüseynin canı onun qüdrət əllərindəndir, atam imam Hüseyn (ə)-dan eşitmişəm ki, buyurub:  "Atam Həzrət Əli (ə)-dan eşitmişəm ki, hər kim Allahın rizasını və Peyğəmbərin (s) hörmətini qazanmaq naminə Şəban ayında oruc tutarsa, Allah-təala onu dost tutar, ona kəramət göstərər və qiyamət günündə behişti ona vacib bilər”.

Həzrət İmam Cəfər Sadiq (ə) şəban ayında bir neçə ayinləri icra etməyi  bu ayın savabı və fəziləti naminə tövsiyə etmişdir. Onlar aşağıdakılardır.

1. Hər gün 70 dəfə de:  "Əstəğfirullahə və əsəluhut-təvbə”.

2. Hər gün 70 dəfə de:  "Əstəğfirullahəl-ləzi la ilahə illa huvər-rəhmanir-rəhimul-həyyul-qəyyumu və ətubu ileyh”.

Bu aylar məğfirət ayları olduğundan bağışlanmaq və günahların əfvi üçün yuxarıda zikr olunan duaların hər ikisi ən münasib və kəramətli dualardandır, bu mənada ki, hər kəs bu ayda 70 dəfə istiğfar etsə, sanki digər aylarda 70 min dəfə istiğfar etmiş kimi olur.

3. Bu ayda əgər bir xurma dənəsinin yarısı boyda da olsa "təsadduq” edilsə, yəni, yetimlərə, kimsəsizlərə, əlillərə və ehtiyacı olanlara əl yetirsə - Allah-təala cəhənnəm odunu onun bədəninə haram edər.

Həzrət Sadiq (ə)-dan sual etdilər ki, "Yəbnə Rəsulullah, əgər bir şəxs şəban ayında bir gün oruc tutarsa, onun savabı nə olar?”

Həzrət buyurdu:  "And olsun Allaha ki, onun savabı və mükafatı behiştdir”.

Ərz etdilər ki, yəbnə Rəsulullah, bu ayda ən yaxşı əməl nədən ibarətdir?

Həzrət buyurdu:  "Təsədduq vermək və istiğfar etmək.”

4. Əgər bir şəxs bu ayın əvvəlindən axırınadək bu zikri 1000 dəfə oxusa, o qədər yüksək savaba yetişər ki, min ilin ibadəti onun "nameyi-əmalində” yazılar. Dua budur: "La ilahə illəllahu və la nəbudu illa iyyahu muxlusinə ləhud-dinə və ləv kərihəl-muşrikun.”

5. Bu ayın hər cümə axşamı hər kəs 2 rükət namaz qılıb, hər rükətdə "Həmddən”sonra 100 dəfə "Töhid” surəsi və "səlamdan” sonra 100 dəfə "salavat" zikr etsə, Allah-təala onu bütün dini və dünyəvi hacətlərə çatdırar.

Rəvayətlərdə varid olub ki, şəban ayının hər cümə axşamı günü asimanlar zinətlənir və mələklər ərz edirlər ki:

 Pərvərdigara! Oruc tutanların günahlarını əfv elə, dualarını qəbul et”!

"Nəbəvi” xəbərlərdə varid olub ki, hər kim şəban ayının hər bazar ertəsi və cümə axşamını oruc tutsa, Allah-təala onun 20 dünyəvi hacətini və həm də 20 axirəvi hacətini vermiş olar.

6. Bu ayda çoxlu salavat zikr edin.

7. Şəban ayının hər günü gün qüruba enəndə, gecə yarısı və hər namazdan sonra İmam Zeynul-Abidin (ə) məruf və kəramətli duasını oxusanız, inşaAlah ki, hədsiz savaba yetişərsiz.

Mənbə: "Allaha pənah, Allaha təvəkkül" kitabı