Məclisdə oturmağın (iştirak etməyin) qaydaları haqqında

Peyğəmbər (s)-dan nəql olunmuş hədisdə deyilir: "Çağırılmamış qonaqlar, ev sahibinə əmr edənlər, düşmənlərindən xeyr gözləyənlər, iki nəfərin arasında olan sirri faş edənlər, padşahlara (vəzifə sahiblərinə) etinasızlıqla yanaşanlar, məclisdə başqalarının oturmasına maneçilik törədənlər, məclisdə danışanların sözlərinə qulaq asmayanlar gördükləri bu işlərə görə rüsvay olarlarsa özlərindən başqa heç kimi danlamasınlar.

Əli (ə)-dan nəql olunmuş hədisdə deyilir: "Sizlərdən elələri vardır ki, iştirak etdiyi məclislərdə hey özünü ortaya ataraq elmini başqalarına nümayiş etdirmək üçün verilən suallara cavab verər və ehtiyac duyulmadığı bir halda başqalarına nəsihət vermək istər. Bu xüsusiyyətlərə malik olan şəxslərin məclislərə getməmələri daha yaxşıdır.

İmam Sadiq (ə)-dan nəql olunmuş hədisdə deyilir: "Məclis qurulduqdan sonra oraya daxil olub yer tapmaq üçün məclis əhlini narahat etməyin. Bu möminlərə yaraşan xüsusiyyət deyildir.

Peyğəmbər (s)-dan nəql olunmuş hədisdə deyilir: "Təvəzökar insan o şəxsdir ki, qarşılaşdığı şəxslərə salam verib onlardan hal-əhval tutsun. Hər-hansı bir məsələ ətrafında onlarla mübahisə etməkdən çəkinsin. Tərəf səhvə yol versə belə, güzəştə getməyi bacarsın. Başqalarının ona tərif etmələrinə imkan yaratmasın və özü haqqında tərif eşitdikdə qürurlanaraq öyünməsin.”

Başqa bir hədisdə deyilir: "Mömin qardaşlarınız məclisə daxil olduqları zaman ehtiram əlaməti olaraq onlara yer göstərin və orada oturduğunuz müddət ərzində onlara xoş sözlər deyib könlünü almağa çalışın. Özünüz qonaq getdiyiniz zaman ev sahibinin sizə təklif etdiyi yerdə oturun. Çünki, o evin şəraitini daha yaxşı bilir.

Əli (ə) bu haqda etdiyi tövsiyələrinin birində buyurur:"Məclislərdə yol ağzında oturub gediş-gəlişə maneçilik törətməyin. Bardaş qurub oturduğunuz zaman paltarlarınızın ətəyini ayaqlarınızın altına salın ki, başqaları yer tapmaq üçün çətinlik çəkməsin.

İmam Sadiq (ə)-dan nəql olunmuş hədisdə deyilir:"Peyğəmbər (s) məclisə daxil olarkən astanaya ən yaxın yerdə üzü qibləyə oturardı. O, ya dizləri üstə , ya sağ ayağını sol ayağının içinə qoyaraq, ya da dizlərini qaldırıb əlləri ilə diz qapaqlarından tutaraq oturardı.

Peyğəmbər (s) səhabələrə tövsiyə edərək buyurardı:"Məclisdə bir-birlərinizə yaxın oturmayın. Məclis tünlük olarsa başqalarını da nəzərə alıb bardaş quraraq oturmayın. Bir-birinizin arasında bir qarış məsafə saxlamaqla məclisə sonradan gələnlər üçün yer ayırın.”

Başqa bir hədisdə deyilir: "Möminlərin iştirak etdiyi məclisə bir o qədər də mələk gələr.Onlar Allah-təaladan bir şey istədikləri zaman mələklər də "amin” deyərlər. Şeytanın şərindən Allaha pənah apardıqları zaman mələklər də Allah-təalaya bu işdə onlara kömək etmək üçün dua edərlər.

Əhli-beyt düşmənləri məclis qurduqları zaman onlarla birlikdə orada həmən miqdarda şeytanlar iştirak edərlər.Onlar danışıb güldükləri zaman Şeytan da onlarla birlikdə şadalanar və onları ələ ala bildiyi üçün fərəhlənər. Əməli-saleh bir insan onların iştirak etdikləri məclislərə səhvən daxil olarsa onu hamılıqla hörmətdən salıb rüsvay etmək istərlər. Məclis əhli Allahın qəzəbinə düçar olar və kimsə Onun qəzəbindən nicat tapa bilməz. Çarəsizlik üzündən orada iştirak etməli olsanız qəlbən də olsa onlardan uzaq olmağa çalışın.

Peyğəmbər (s) buyurur: "Məclislərinizi Əli ibni Əbi Talibi yad etməklə ziynətləndirin.Bilin ki, onun vücudunda peyğəmbərlərə xas olan yetmiş xislət vardır. Allah-təala ona bəxş etdiyi fəzilətləri kimsəyə bəxş etməmişdir. Allah-təala onun fəzilətləri haqqında söhbət edən və bu söhbətlərə qulaq asan şəxslərin günahlarını bağışlayar. Mələklər isə bu fəzilətləri yazan kəslər ücün istiğfar edər.

Başqa bir hədisdə deyilir:"Allah-təala cənnət qapılarının yollarını elm üçün yola çıxan kəslərin üzünə açar və mələklər öz qanadlarını onun qədəmləri altına salarlar.”

İmam Baqir (ə)-dan nəql olunmuş hədisdə deyilir: "Elmdə bəhs edən kəslər qəbul olunmuş namazın savabını qazanarlar.”