İslam Ramazan ayında oruc tutmağı, orqanizmi həm fiziki, həm də mənəvi baxımdan təmizləməyi buyurur. Artıq 3 ildir ki, orucluq ayı Azərbaycanda yay mövsümünə təsadüf edir. Ramazan ayının ilin ən isti günlərinə düşməsi və oruc tutmaq müddətinin daha uzun olması insan orqanizmində çoxlu maye itkisinə səbəb olur. Bəs görəsən qızmar yay günlərində vacib ibadəti insanlar necə yerinə yetirir?
Bu məqsədlə ANS-in əməkdaşları paytaxtda qısa sorğu aparıb. Məsələn oruc tutan Yavər Əlizadə deyir ki, gün ərzində su sanki ona yaddır. Yalnız axşamlar yadına düşür. Onun sözlərinə görə, sadəcə istidən qorunmaq lazımdır ki, halsızlıq, susuzluq olmasın.
Nicat Süleymanov isə deyir ki, orucun hikməti çənitliyə dözüb savab qazanmaqdadır: "Əlbəttə ki, yayda bir az çətinlik olur. Amma orucun fəziləti də ondadır ki, çətinliyə dözüb savab qazınırsan”.
Neçə ildir oruc tutan Ofelya Qasımova üçün isə elə bir çətinlik yoxdur. "Allah özü kömək olur. Əvvəl elə bilirdim ki, 16 saat oruc tutmaq çətin olar. İndi görürəm ki, çətin deyil. Yemək də bişirirəm, çay da qoyuram, süfrə hazırlayıram. Evdəkilər hamısı oruc tutmur axı. Orucluq özün üçündür, daxili aləmin üçündür. Yəni sən onu hiss etmirsən ki, kiməsə yemək verdin, su verdin”, - deyə o bildirib.
Din alimləri isə hesab edir ki, yayda tutulan orucun savabı daha böyükdür. Çünki Tanrı isti havalarda öz bəndəsinin səbrini bir daha sınağa çəkir.
Qafqaz Müsəlmanları İdarəsinin şöbə müdiri Hacı Mirəziz Seyidzadənin sözlərinə görə, belə isti günlərdə oruc tutan insanların duş qəbul etməsi, əl-üzünü yuması orucu batil etməz: "Dənizdə, hovuzda çimmək olar, bir şərtlə ki, baş suya girməsin. Ağızı da yaxalamaq olar. Amma çalışsınlar ki, bunu gün ərzində bir dəfədən artıq etməsinlər, su da boğaza getməsin.
Allahdan bütün müsəlmanlara səbr diləyirik.
Tanrı oruclarımızı və bütün "qürbətən İLƏLLAH" niyyətilə etdiyimiz əməlləri qəbul etsin!!!