Hüseynə (ə) aşiq olan
Can onun ahı ilə eşqi-həyat tapmışdır.
Ona aşiq olan, əcrin ikiqat tapmışdır.
Kim Hüseyn aşiqi olmuş, o, nicat tapmışdır.
Sən Hüseyn ibni Əli eşqinə etsən marağı.
Tanıyarsan ki, nədir dəhrdə eşqin sınağı.
***
Oxunan mahu-məhərrəmdə vəfa nəğməsidir.
Soyuyan qəlbimizi eyni hərarət isidir.
Nökərin həddi nədir ki, ağanın məclisidir?!
Gəl o Xaqana əza saxlayaq aşiqsayağı,
Qapısın aç, kədər olsun qoy ürəyinin qonağı.
***
Qara pərçəm ələ al, niyyətim aşkardı mənim.
Qara pərçəmdə yazılsın bir ağam vardı mənim.
De qulam mən, nökərəm, şahım Ələmdardı mənim.
Desələr kimdir Ələmdar, denən haqqın dayağı?
Sanki, səhrada ağacdır qırılıb qol-budağı.
***
Susuz ölmək elə bir dərddi, sığışmaz cahana.
Sanki səslər Əli Əsğər, mənə su ver, ay ana...
Hüseyn yadigarın bir ox alıbdır nişana.
Çalışır Hərmələ vursun boğazından uşağı.
Vurma! İnsaf elə, onsuz quruyub dil-dodağı.
***
Əli övladı ilə rəftar edirlər nə sayaq?
Görməyir göz-gözü heç, hər tərəf olmuş tozanaq.
Kərbəla çölləri qan, Hüseyn gözlərindən iraq
Bir çadır yanmadadır, haqqa-qatırlar nahağı,
O çadırdan da gəlir Zeynəbinin səs-sorağı.
***
Şəriət bayrağı Mövla, sənə xatir ucalıb.
Səni kim anlamayıbsa, əqilin şeytan alıb.
Nə səbəb bəzi adamlar sənə biganə qalıb?
Axı sülh insanı, sən qurmamış idin nifaqı.
Bir amalın var idi, zülmün alınsın qabağı.
***
Hüseyn aşiqi aşiqdi ki, danəndə deyil.
Bunu sən anlamayırsansa, günah məndə deyil.
Sözümün qiymətini Tanrı verə, bəndə deyil.
Əlinizdən nə gələr, alqış edərsiz uzağı.
Mən çalışdım şeirim tərpədə qəlblərdə dağı.