Bəziləri belə düşünür: “Daha çox pulum olsaydı, daha yaxşı insan olardım”
İnsan olmaq üçün çox çətinliklərdən keçmək və çox şeylər yaşamaq lazımdır.
Antuan de Sent Ekzyuperi
Biz əvvəlcə özümüzdə müəyyən bir şəxsiyyəti formalaşdırır, ondan sonra o şəxsiyyətə uyğun olan şəraitləri, işləri, dostları və ətraf mühiti cəlb etməyə başlayırıq.Hər bir insanın həyatı formalaşmış şəxsiyyətini əks etdirir.Əvvəlcə şəxsiyyət kimi yetişirik, ondan sonra isə maddi planda və həyatın digər sahələrində uğurlar əldə edirik.
Hər bir şəxs öz batini xüsusiyyətinə uyğun olan gələcəyə doğru gedir
Təəssüf ki, insanların böyük əksəriyyəti hər şeyin əksinə baş verməli olduğunu hesab edir.Onların düşüncələri belədir: “daha çox pulum olsaydı, daha yaxşı insan olardım”, “daha yüksək vəzifəyə qalxsaydım, daha çox dəyərə malik olardım”, “böyük evim və imarətim olsaydı, qonşular yanında hörmətli olardım”. Lakin həyat belə qurulmayıb və yaradılış qanunları tamamilə başqa cür işləyir. Daha çox maddiyyata malik olmaqla, şəxsiyyət cəhətindən biz daha üstün birinə çevrilmirik. Milyona sahib olan axmaq, milyoner axmağa, böyük imarətə sahib cahil də, imarətli cahilə çevrilir. Pulu onu dəyişərək üstün biri etməz. Dəyər,hörmət,şəxsiyyətlilik,üstünlük,alicənablıq –bütün bunlar mənəvi keyfiyyətlərdir və maddiyyatla heç bir əlaqəsi yoxdur. Quranda belə bir ayə vardır: “Allah yanında dəyərli olanınız, daha çox təqvalı olanınızdır”.
Təqva- ən üstün şəxsi,əxlaqi və ideoloji keyfiyyətə deyilir.Müqəddəs kitab da yaradılış sistemində dəyərlərin maddi deyil, mənəvi ox ətrafında fırlandığını deyir.
Kitabın adı: Hər bir insan hökmdardır
Müəllif: Rövşən Abdullaoğlu