Allahın salamı və rəhməti üzərinizə olsun. Bu gün İmam Cavadın (ə) şəhadət günüdür. Bu münasibətlə başda İmam Zaman (ə.f) olmaqla, bütün şiələrə başsağlığı veririk. Allah bizlərə Əhli-beytin bu dünyada ziayrətin, axirətdə isə şəfaətin nəsib etsin. Allah bizləri heç vaxt Quran və Əhli-beytdən ayrmasın. Allah daim Əhli-Beyt düşmənlərinə lənət etsin. Məzlum ağamıza salavat zikr edək: Əllahummə salli əla Muhəmməd və ali Muhəmməd...
İmam Cavad (ə)-ın şəhadəti
Doqquzuncu imamın adı Mühəmməd, künyəsi Əbu Cəfər, ləqəbləri Təqi və Cavaddır. O həzrət 195-ci hicri-qəməri ilində Mədinə şəhərində anadan olmuşdur. Atası imam Rza (ə), anası isə İslam Peyğəmbərinin (s) həyat yoldaşı Mariya Qibtiyyənin nəslindən olan Səbikə (Səkinə) Novbiyyə, başqa rəvayətə görə isə Xeyzərandır. İmam Cavadın (ə) atası vəfat edərkən, təxminən, səkkiz yaşı olmuş, imamlıq dövrü on yеddi il sürmüş, 220-ci h.q. ilinin Zil-həccə ayında iyirmi beş yaşında ikən şəhadətə yetmiş və Kazimeyn şəhərində babası imam Kazimin (ə) məzarının yanında dəfn olunmuşdur. (“Üsuli-kafi”, c.1, səh.492) İki oğlu və iki qızı olmuşdur.
Tarixçilər o həzrətin şəhadəti ilə bağlı belə yazırlar:
218-ci h.q. ilində Məmun vəfat edir. Ondan sonra qardaşı Mötəsim hakimiyyətə gəlir. O, imam Cavadı (ə) öz nəzarəti altında saxlamaq məqsədi ilə 220-ci h.q. ilində o həzrəti Mədinədən Bağdada gətirir. İmam (ə) Bağdada gəldikdən sonra Mötəsimin, oğrunun əlinin haradan kəsilməsi barədə təşkil etdiyi məclisdə iştirak edir. Həmin məclisdə Bağdad qazısı İbn Əbu Duad və başqaları (səhv fətva verdiklərinə görə) rüsvay olur, bundan bir neçə gün sonra İbn Əbu Duad həsəd və paxıllığı nəticəsində xəlifənin hüzuruna gəlib deyir: “Mən xeyirxahlıq məqsədi ilə sənə xəbərdarlıq edirəm ki, bir neçə gün bundan qabaq baş vermiş hadisə sənin hakimiyyətinin xeyrinə deyil. Çünki sən bütün hökumət alimləri və yüksəkrütbəli nümayəndələrin hüzurunda (imam) Cavadın (ə) fətvasını başqalarının fətvasından üstün tutdun. Halbuki müsəlmanların yarısı onu əsl xəlifə, səni isə onun haqqını qəsb etmiş bilirlər. Bu xəbər bütün camaat arasında yayılaraq onun haqq olduğuna qəti bir sübut olacaq.”
Qəlbində imam Cavada (ə) qarşı düşmənçilik və kin-küdurət bəsləyən Mötəsim onun sözlərindən bərk narahat olur və İmamı (ə) öldürmək fikrinə düşür. Nəhayət, o, öz çirkin məqsədini həyata keçirib, imam Cavadı (ə) vəzirlərindən birinin katibi vasitəsilə zəhərləyib şəhid edir. (“Əl-irşad”, səh.326.)
Müəllif: Rza Şükürlü
Qeyd : Şeyx Abbas Qumi "İmam Mühəmməd Təqi əleyhissalamın həyatı" kitabında yazır ki: "O məzlumun (imam Təqinin (ə)) şəhadətinin necə baş verməsi haqqında ixtilaflar mövcuddur. Məşhur budur ki, zövcəsi, Məmunun qızı Ümmül-Fəzil əmisi Mötəsimin göstərişi ilə o Həzrəti zəhərlədi.