Təsirli sözlərin həyat çətinliklərində rolu

Qəlbdən gələn söz qəlbə oturar.

Nizami Gəncəvi

İnsanın bütün hərəkətlərini onun iradəsi idarə edər. İradəyə isə bir neçə faktor təsir edir. Ruhlandırıcı və şövqverici sözlərin, stimul mənbələrinin iradəni işə salma gücü danılmazdır. Tarixdən bizə məlumdur ki, bir çox hallarda sərkərdələrin öz əsgərlərinə dedikləri ruhlandırıcı bir neçə söz döyüşün nəticəsində həlledici rol oynamışdır. Bəzən də hər hansı bir aforizm, dahilərin kitablarından bir sitat insana elə bir təkan verə bilər ki, həyatını tamamilə dəyişər. Bu sözlər də fərdə nisbətdə dəyişməkdədir. Çünki hər bir insanın dünya görüşü, dəyərlər sistemi, həyatı, mühüm bildiyi mövzular fərqlidir. Bu səbəbdən siz, özünüzə təsir edəcək olan hər hansı bir kəlamı, sözü tapmalısınız. Sonra bu sözü özünüzlə gəzdirə və ya iş masanızın üzərində bir yerdə qərar verməlisiniz ki, daim oxumaq imkanınız olsun.
Ən çətin həyat şəraitində belə sözlər böyük rol oynaya bilir. Belə ki, bir çox dahi şəxslər çətinliklərlə üzləşən zaman mənəvi güclərini artırmaq, özlərinə stimul vermək üçün ilhamverici kəlmələrdən istifadə etmişlər. Məsələn, məşhur İsveçrə psixiatrı Karl Qustav Yunq on doqquz yaşında olarkən Rotterdamlı Erazmın “Çağırılsa da, çağırılmasa da, Allah hər zaman mövcuddur” sözünü oxuyan zaman çox təsirlənmişdi. Bu söz ona o qədər müsbət stimul vermişdi ki, daim gözünün önündə olması üçün onu öz ekslibrisinə daxil etmişdi. Daha sonra isə o sözləri öz evinin daş alaqapısının üzərində oydurmuşdu. İngilis yazıçısı Con Reskinin də yazı masasının üstündə üzərində “bu gün” sözləri oyulmuş daş var idi. O, buna baxaraq yalnız bu günlə yaşamaq lazım olduğunu, keçmişə və gələcəyə görə narahat olmamağı yadına salardı. Deyl Karneginin masasının üstündə belə bir daş yox idi, lakin əvəzində onun güzgüsünə məşhur hind dramaturqu Kalidasa məxsus şerdən ibarət olan kağız parçası yapışdırılmışdı. Kalidas bu şerdə insanın əlində olan gününün dəyərini bilməsindən və gələcək inkişafın bundan asılı olmasından danışır. Bu şer, həmçinin XIX əsrdə yaşamış tanınmış həkim və filosof Ser Uilyam Oslerin də yazı masasının üstündə var idi. O, bu şeri həmişə öz yazı masasının üzərində qərar verərdi ki, mütəmadi olaraq orada yazılanları xatırlasın.
Mümkündür ki, bir müddət istifadə edilən kəlam sonradan bəzi insanlar üçün təsirdən düşsün. Bu zaman başqa bir ilhamverici sözü axtarıb tapmaq və köhnə kəlamı yenisi ilə əvəz etmək lazımdır.
Bəzi şəxslər isə, təsiredici sözlər əvəzinə, hər hansı bir əşyadan istifadə edirlər. Bir çox müvəffəq iş adamları vardır ki, imkansız vaxtlarında geyindikləri nimdaş paltarları iş otaqlarında saxlayırlar. Nə zaman çətinliklə üzləşsələr, onlara baxar və bununla ən çətin və sıxıntılı günlərini xatırlayarlar. Bəziləri isə özlərinə ruh yüksəkliyi verən şəxslərə aid hər hansı bir əşyanı özlərində gəzdirərlər. Bütün bu hallarda əsas məqsəd problem və çətinliklərlə üzləşən zaman müsbət mənəvi enerji almaqdır.

Kitabın adı: Çətin olsa da, həyat davam edir
Müəllif: Rövşən Abdullaoğlu