Fitr bayramıdır. Bir neçə əmələ malikdir:
1. Sübh və bayram namazından sonra, həmin günün gecəsi vacib namazdan sonra oxuduğu təkbirləri oxusun.
2. Seyidin rəvayət etdiyi duanı "Əllahummə inni təvəccəhtu iləykə bi Məhəmmədin əmami...” sübh namazından sonra oxusun. Şeyx bu duanı bayram namazından sonra gətirmişdir.
3. Fitrə pulu çıxarmaq. Hər adama bir "sa”(təxminən 3 kq) bayram namazından sonra, necə ki, təfsilatı ilə fiqhi kitablarda gəlmişdir, fitrə cıxarmaq vacibdir. Fitrə pulu təkid olunmuş vaciblərdəndir. Ramazan ayının qəbul olma şərtlərindəndir və gələn ilə qədər bəlalardan qorunmağa səbəb olar. Allah taala zəkatı (o cümlədən fitrə zəkatını) ayədə namazdan qabaq gətirmişdir. – "Qəd əfləhə mən təzəkka və zəkərəsmə rəbbihi fəsəlla.”
4. Qüsl almaq. Əgər mümkün olsa çayda qüsl alsa yaxşıdır. Vaxtı, dan yeri söküləndən bayram namazı qılınana kimidir. Necə ki, Şeyx belə buyurub: "Hədisdə deyilir ki, qüslü, tavanı olan yerdə al. Qüsl alarkən belə de:
İlahi, Sənə iman gətirdiyimə, kitabını təsdiq etdiyimə və peyğəmbərin Məhəmmədin (Allahın salamı olsun ona və Əhli-beytinə) sünnəsinə tabe olduğuma xatir!
Sonra Bismillah deyib qüsl al. Aldıqdan sonra belə de:
İlahi, onu (qüslü) günahlarımın kəffarəsi qərar ver və dinimi pakla! İlahi, çirkinliyi məndən uzaqlaşdır!
5. Təmiz geyimlər geyinmək, gözəl ətirlərdən istifadə etmək və namaz qılmaq üçün Məkkədə olmasa, səhraya açıq səmanın altına getmək.
6. Bayram namazından qabaq birinci iftar elə (yaxşı olar ki, xurma, ya şərbətlə edə). Şeyx Mufid yazır ki, bütün dərdlərə şəfa olan İmam Hüseyn (ə)-ın türbətindən bir az yemək müstəhəbdir.
7. Elə ki, bayram namazına getməyə hazırlaşdın, gün çıxmamış evdən çıxma və Seyidin "İqbal”da nəql etdiyi bu dualardan oxu. O cümlədən Əbu Həmzə Sumali, İmam Baqirin(ə) belə buyurduğunu nəql edir:- "Fitr, qurban bayramlarında və cümə günündə namaza getməyə hazır olduqda bu duanı oxu:
İlahi, hər kəs bu gündə məxluqun ümidi ilə, ondan bir bəxşiş almaq üçün hazırlaşıb səfər yükü bağladısa, ey mənim sərvərim, mənim də ümidim, mükafat və bəxşiş almağım, tədarük görüb hazırlaşmağım Sənə doğrudur. Peyğəmbərin Məhəmmədin (Allahın salamı olsun ona və Əhli-beytinə) bayramlarından birinə qədəm qoymuşam və bu gün Sənə təqdim etmək üçün yaxşı əməlimə ümid bəsləyib, ona arxalanmaqla dərgahına üz tutmamışam, məxluqatından da heç kimə üz tutub bel bağlamamışam. Əksinə təvazökarlıq, günahlarımı etiraf və özümə zülm etməklə Sənin dərgahına gəlmişəm. Belə isə, ey böyük Allah, ey böyük Allah, ey böyük Allah, mənim böyük günahlarımı bağışla ki, Səndən başqa heç kim böyük günahları bağışlamaz! Ey Səndən başqa heç bir tanrı olmayan, ey mehribanların ən mehribanı!
8. Bayram namazı qılmaq və o iki rükətdir. Birinci rükətdə "Həmd” surəsi ilə "Əla” surəsini oxumaq. Qurtardıqdan sonra beş təkbiri var, hər təkbirdə qunutda belə deyirsən:
İlahi, Sən calal və əzəmət, bəxşiş və qüdrət, əfv və rəhmət, təqva və məğfirət sahibisən! Səndən istəyirəm ki, müsəlmanlar üçün bayram və Məhəmməd (Allahın salamı olsun ona və Əhli-beytinə) üçün zəxirə, şərəf və yüksək məqam təyin etdiyin bu günə xatir, Məhəmməd və Məhəmmədin Əhli-beytinə salam göndərəsən, Məhəmməd və Məhəmmədin Əhli-beytini daxil etdiyin hər bir xeyir və səadətə məni də daxil etdirəsən, Məhəmməd və Məhəmmədin Əhli-beytini (Allahın salamı olsun ona və onlara) çıxartdığın hər bir şərdən məni də çıxarasan! İlahi, mən Səndən saleh bəndələrinin Səndən istədiklərini istəyir, saleh və xalis bəndələrinin Sənə pənah gətirdikləri ilə Sənə pənah gətirirəm!
Altıncı təkbiri dedikdən sonra rükuya gedir. Rüku və səcdədən sonra isə ayağa qalxıb ikinci rükətə başlasın. Qiyamda "Həmd” surəsindən sonra "Şəms” surəsini oxusun. Qunutu isə dörd təkbirdir. Qunutda yuxarıda deyilən duanı oxusun. Elə ki, beşinci təkbiri qurtardı, rükuya gedib namazı bitirsin. Salamdan sonra Fatimə Zəhranın (s)-nın təsbihatını desin.
Bayram namazından sonra çoxlu dualar zikir olunmuşdur. Bunların ən yaxşısı Səhifətun Səccadiyyənin 46-cı duasıdır.
Bayram namazının açıq səma altında, yerdə, torpağın üstündə heç bir şey olmadan qılmaq və evə qayıdarkən gəldiyi yoldan qayıtmamaq müstəhəbdir. Yaxşı olar ki, bütün mömin qardaş və bacıların əməllərinin qəbul olması üçün dua eləsin.
9. İmam Hüseyn əleyhissalamın ziyarəti.
10. "Nüdbə” duasını oxusun. (İmam Zaman (ə.c)-ə aid olan fəsildə gələcək. Seyid ibn Tavus buyurur ki, duanı bitirdikdən sonra səcdəyə gedib bu sözləri desin:
(İlahi,) mən Sənə hərarəti sönməyən, təzəliyi köhnəlməyən, susuzluğu aradan qalxmayan cəhənnəmin odundan sığınıram!
Sonra sağ üzünü yerə qoyub desin:
İlahi, mən Sənə minnət qoymadan, əksinə Sənin mənə minnətin olduğu halda, Sənə səcdə etdikdən və Sənə xatir üzümü torpağa sürtdükdən sonra üzümü cəhənnəmə atma!
Daha sonra sol üzünü yerə qoyub desin:
Pislik edən, itaət etməyən, çarəsiz qalan və (onları) etiraf edən şəxsə rəhm et!
Yenidən səcdə halına qayıdıb desin:
Əgər mən pis bəndəyəmsə, Sən isə yaxşı Rəbsən! Sənin bəndənin günahı böyükdür, belə isə, Sənin əfv və güzəştin yaxşı olmalıdır, ey kəramət sahibi!
Sonra yüz dəfə desin:” Əl-əfvə əl-əfvə”
Daha sonra Seyid buyurur:
Sən əməllərinin qəbul və ya rədd olunmasını bilmədiyin halda, bu gününü boş-boşuna və əyləncə ilə keçirmə! Əgər əməllərinin qəbuluna ümid edirsənsə, yaxşı şükürlə onun əvəzini ver və əgər əməllərinin rədd olunmasından qorxursansa, uzun kədərə qapıl!
Kitabın adı: Məfatihul Cinan
Admin: 3
Redaktor: 4
Sayt nəzarətçisi: 7
VİP: 1
İstifadəçi: 6714
Bu gün: 2
