Bilin ki, gecə namazının fəziləti barəsində məsum imamlardan (ə) çoxlu hədislər rəvayət olunubdur. Hədislərimizdə deyilibdir ki, gecə namazı, möminin şərəfidir və bu namaz, bədənin sağlamlığına, gün ərzində işlətdiyin günahların bağışlanmasına, qəbir vəhşətinin aradan qalxmasına, üzün nuraniləşməsinə, bədənin xoş ətir saçmasına və ruzinin çoxalmasına bais olur. Mal-dövlət və oğul, dünyanın zinəti olduğu kimi, gecənin axırında qılınan səkkiz rükət gecə namazı, Şəf və Vətr namazı ilə birlikdə axirətin zinətidir. Bəzən, Allah taala, bu iki zinətin hər ikisini də insana verir. Gecə namazı qıldığını, lakin gündüz, ac qaldığını iddia edən şəxs, yalançıdır. Çünki gecə namazı, ruzinin nazil olmasına zamindir. Həzrət Sadiqdən (ə) rəvayət olunur ki, Allahın elçisi Hz. Əliyə (ə) etdiyi vəsiyyətdə buyurubdur: "Ey Əli, nəfsini, bu bir neçə xislətə (xasiyyətə) alışdır və onları yadında saxla! İlahi, ona köməkçi ol!” O həzrət bir sıra xislətləri saydı və o cümlədən buyurdu:
(Gecə namazını tərk etmə, tərk etmə, tərk etmə!!! Günorta namazını tərk etmə, tərk etmə, tərk etmə!!!)
Başqa hədislərdən istifadə olunur ki, Allahın elçisinin (s.ə.s) vəsiyyətində buyurduğu "Gecə namazı”ndan məqsədi, on üç rükət gecə nafiləsi və "Günorta namazı”ndan məqsədi, günorta namazının səkkiz rükət nafiləsidir.
Ənəs rəvayət edir ki, mən, Hz. Rəsulillahdan (s.ə.s) eşitdim: "Gecənin ortasında iki rükət namaz qılmaq, mənim üçün dünya və onun bütün nemətlərindən üstündür.” Həmçinin başqa bir hədisdə nəql olunur ki, İmam Zeynulabidindən (ə) soruşdular: "Nə səbəb olur ki, gecə vaxtı ibadətlə məşğul olan kəslərin üzü başqalarından daha parlaqdır?” O həzrət buyurdu: "Çünki onlar öz Allahları ilə xəlvətə çəkilirlər və Allah taala, onları öz nuruna bürüyür.”
Bir sözlə, bu barədə saysız-hesabsız hədislər mövcuddur. Gecə oyanmağı tərk etmək məkruhdur. Şeyx Bərqi, mötəbər sənələ həzrət İmam Məhəmməd Baqirdən (ə) bu hədisi rəvayət edibdir: "Gecənin özünə məxsus Rəha adlı bir şeytanı vardır. Hər bir bəndə, oyanıb, gecə namazını qılmaq üçün ayağa qalxaq istədikdə, o şeytan ona deyər: "Hələ oyanmaq vaxtı deyil.” O bəndə ikinci dəfə oyanıb, ayağa qalxmaq istədikdə, yenə də o şeytan ona deyər: "Hələ oyanmaq vaxtı deyildir. (hələ tezdir, bir az da yat)” Beləliklə, Günəşin şəfəqi doğana qədər onu oyanıb, ayağa qalxmaqdan çəkindirər. Şəfəq doğan kimi, o bəndənin qulağına bövl edər və sevincindən quyruğunu tərpədərək, onun kənarından çəkilər.” İbni Əbi Cümhur, rəvayət edir ki, həzrət Rəsulillah (s.ə.s) günlərin birində öz səhabələrinə buyurdu: "Sizin hər biriniz yatdığınız vaxt, şeytan sizin başınızın arxasına üç düyün vurar və hər bir düyünü vurduqda deyər: "Ələykə ləylun təvilun fərqud.” (Gecə uzundur, hələ yat.) Hər kim, oyanıb, Allahı zikir etsə, o düyünlərdən biri açılar. Dəstəmaz aldıqda isə ikinci düyün də açılar. Namaz qıldıqda üçüncü düyün də açılar. Beləliklə, o, şad və pakizə ruhiyyə ilə sübhü açar. Əks təqdirdə isə o bəndə, xəbis və yorğun bir halda sübhü açar.” Bu hədis, sünnü məzhəbinin kitablarında da nəql olunubdur. Qütb Ravəndi həzrət Əmirilmöminin Əlidən (ə) bu hədisi rəvayət edibdir: "Heç vaxt bu üç şey vasitəsilə, bu üç şeyə can atma:; Çox yeyib, gecə vaxtı oyanmağa. Bütün gecəni yatıb, üzün nurlu olmağına. Fasiqlərlə həmnişin olub, dünyadan amanda qalmağa.” Həmçinin Qütb Ravəndi rəvayət edir ki, Hz. İsa (ə) anası Məryəmi (s) ölümündən sonra çağırıb, dedi: "Ey anam, mənə de ki, yenidən dünyaya qayıtmaq istəyirsənmi?” Həzrət Məryəm (s.ə.) buyurdu: "Bəli. Onun üçün qayıtmaq istəyirəm ki, çox soyuq bir gecədə Allaha namaza qılım və çox isti bir havada oruc tutum. Ey oğlum, bu yol, çox qorxulu bir yoldur.”
Kitabın adı: Məfatihul Cinan
Admin: 3
Redaktor: 4
Sayt nəzarətçisi: 7
VİP: 1
İstifadəçi: 6678
Bu gün: 0
