«Qədir-xum» - Dinimizin kamil olduğu gündür
Hicrətin 10-cu ilində Peyğəmbər (s) sonuncu həcc ziyarətindən -
«Həccül-vida»dan qayıdarkən, Zucan adlı yerə yetişdikdə, ona
yeni bir vəhy nazil oldu. Allah Taala Peyğəmbərə (s) buyurdu:
«Ey Rəsul! Sənə nazil olanları insanlara çatdır, əgər bu işi
görməsən, öz risalətini (peyğəmbərlik missiyasını) tamamlamamış
olursan…». («Maidə» surəsi, 67)
Bundan sonra Peyğəmbər (s) Cuhfə adlı yerdə yol ayrıcına
çatanda, dayanmaq barədə göstəriş verdi. Sonra yüz mindən
artıq zəvvarın qarşısında, dəvə palanlarından düzəldilmiş
minbərin üstünə çıxaraq, müsəlmanlara dedi: «Ey insanlar! Mən
tezliklə sizin aranızdan gedəcəyəm, mənim və həmçinin sizin
öhdənizdə böyük bir məsuliyyət var. Siz mənə necə şəhadət
verirsiniz?». Hamı uca səslə dedi: «Biz şəhadət veririk ki, sən
peyğəmbərlik vəzifəni yerinə yetirmisən, xeyirxahlıq şərtlərinə
əsaslanaraq, bizim hidayət olmağımız üçün son dərəcə əzmlə
çalışmısan. Allah bunun əvəzində sənə savab mükafatı versin!».
Sonra Peyğəmbər (s) buyurdu: «Siz Allahın birliyinə, mənim
peyğəmbərliyimə, Qiyamət gününün haqq olmasına və həmin gün
ölənlərin imtahan vermək üçün yenidən dirilməsinə
inanırsınızmı?». Hamı cavabında dedi: «Bəli, inanırıq!». Rəsuli-
Əkrəm (s) dedi: «İlahi, şahid ol!». Sonra O, Həzrət Əlinin (ə)
əlindən tutub qaldırdı ki, hamı onu görsün və hamısı onu tanısın.
Peyğəmbər (s) buyurdu: «Möminlər arasında ən üstün şəxs
kimdir?» - müsəlmanlar cavab verdi: «Allah və Onun peyğəmbəri
daha yaxşı bilir!». Peyğəmbər (s) buyurdu: «Allah Təbarək və
Taala mənim mövlam və rəhbərimdir, mən isə iman gətirənlərin
rəhbəriyəm və onların işlərində özlərindən daha
məsuliyyətliyəm!». Sonra buyurdu: «Mən hər kimin rəhbəriyəmsə,
bu ( Əli (ə) ) da onun rəhbəridir». Bu sözləri dörd dəfə təkrar etdi
və sonra dua etdi: «İlahi! Əlinin (ə) dostları ilə dostluq et,
düşmənləri ilə düşmən ol, onu sevənləri sev, ona qarşı qəzəbli
olanlara Sən də qəzəbli ol, ona kömək edənlərə kömək et, ona
kömək etməyənlərə kömək etmə, onu haqdan ayırma və haqqı
həmişə onunla birlikdə et!». Sonra əlavə etdi: «Burada olanların
vəzifəsi, bu xəbəri burada olmayanlara çatdırmaqdır!».
Peyğəmbərin (s) xütbəsi sona çatandan sonra camaat
dağılmamış, Qurani-Kərimin bu ayəsi nazil oldu: «Bu gün Mən
sizin üçün dinimi kamil, höccətimi isə tamam etdim. Sizin üçün din
olaraq İslamı bəyəndim…». («Maidə» surəsi, 3)
Bundan sonra Peyğəmbər (s) buyurdu: «Allah böyükdür, Allah
bizim üçün öz dinini təkmilləşdirdi və nemətlərini bizim üçün
tamam etdi. Mənim peyğəmbərliyimi və Əlinin (ə) məndən sonra
ümmətə rəhbər olmasını bəyəndi».
Bu zaman sevinc dolu səslər ucaldı. Bütün səhabələr Həzrət
Əliyə (ə) yaxınlaşaraq dedilər: «Bəh-bəh ey Əbu Talibin oğlu
(Əli), sən bizim və bütün iman gətirənlərin rəhbəri oldun! Səni
təbrik edirik!».
Nazil olunan ayədən görünür ki, Peyğəmbərimizin (s) ömrünün
sonunda, mühüm bir məsələ qalmışdı ki, əgər o məsələ həll
olunmasa idi, risalət tamamlanmayacaqdı. Peyğəmbərin 23 illik
zəhməti ilə bərabər olan və müsəlmanların bilməsi zəruri olan bu
məsələ, onların bildikləri mətləbləri təkrarlamaq deyil,
Peyğəmbərdən (s) sonra öz müqəddəratlarının kimə tapşırılması
məsələsi idi. Təbii ki, bu məsuliyyət də insanların ən fəzilətlisinə
və ən üstününə tapşırılmalı idi ki, bu şərəfli işin öhdəsindən gələ
bilsin.
Qədir-Xum – dinin kamilləşmə bayramı, mübarək dinimizin Allah
Təala tərəfindən bəyənildiyi bir tarixdir.
Kitabın adı: Qədir-xum ilə tanışlıq
Müəllif: Hacı Əhliman Rüstəmov
Admin: 3
Redaktor: 4
Sayt nəzarətçisi: 7
VİP: 1
İstifadəçi: 6704
Bu gün: 0
