383. Malın Allah yolunda sərf olunması
1744. Malın Allah yolunda sərf olunması
Qur‘an:
«Ey iman gətirənlər! Alış-verişin, dostluğun və şəfaətin mümkün olmayacağı gün gəlməmiş, sizə verdiyimiz ruzidən (Allah yolunda) paylayın. Kafirlər isə özlərinə zülm edənlərdir.»
«Allaha və Onun Peyğəmbərinə iman gətirin. Sizi varis etdiyi maldan xərcləyin. Sizdən iman gətirib (mallarını Allah yolunda) sərf edənləri, böyük bir mükafat gözləyir.»
«Malınızdan sərf etdiyiniz hər hansı bir şeyi, özünüz üçün etmisiniz.»
Həmçinin müraciət et: «Bəqərə» 261,265; «İnsan» 8.
Hədis:
6231. Allahın Peyğəmbəri (s): «Qiyamət torpağı, möminin kölgəsi istisna olmaqla, tamamilə od içindədir. Çünki onun verdiyi sədəqə başı üzərinə kölgə salır.»
6232. Allahın Peyğəmbəri (s): «Kim Allah yolunda bir dirhəm versə, Allah onun üçün yeddi yüz savab yazar.»
6233. Allahın Peyğəmbəri (s) (öz səhabələrinə xitabən):–«Sizlərdən kim öz varisinin malını öz malından daha çox istəyir?» Səhabələr dedilər: «Ey Allahın Peyğəmbəri, bizim hamımız öz malımızı varisimizin malından daha çox istəyirik.»
Peyğəmbər buyurdu: «Hər bir kəsin malı, yalnız (axirət üçün) qabağa göndərdiyidir. Varisinin malı isə insanın özündən sonra qoyub getdiyi maldır.
6234. İmam Əli (ə): «Xoşa o adamın halına ki, malının artığını Allah yolunda xərcləyir və özünün artıq danışmasının qarşısını alır.»
6235. İmam Əli (ə): «Siz bağışladığınız şeydən, onu əldə etmiş şəxsdən daha çox xeyir qazanırsınız.»
6236. İmam Əli (ə) (əziz oğlu imam Həsənə (ə) tövsiyəsindən):–«Əslində sənin dünyadan payın, onun vasitəsiylə axirətini qurduğun şeydir. Buna görə də haqq yolda xərclə və başqalarının xəzinədarı olma.»
6237. İmam Baqir (ə): «Heç nəyi, müqabilində daha artıq bir şey almaq məqsədi ilə bağışlama.»
6238. İmam Sadiq (ə): «Məlundur, məlundur o şəxs ki, Allah ona mal bağışlasın və o, həmin maldan sədəqə verməsin.»
1745. Allah-taala Onun yolunda sərf edilmiş şeyin əvəzini verəcəyini və’d etmişdir
Qur‘an:
«De ki: Həqiqətən, Rəbbim bəndələrindən istədiyinin ruzisini bol edər və yaxud azaldar. (Allah yolunda) Nə xərcləsəniz, O, onun əvəzini verər. O, ruzi verənlərin ən yaxşısıdır.»
Hədis:
6239. Allahın Peyğəmbəri (s): «Heç bir mal sədəqə verməklə azalmayıb. Odur ki, verin və qorxmayın.»
6240. «Kənzul-Ummal»: «Ayişə deyir: Bir qoyun kəsdilər (və onun ətini payladılar). Peyğəmbər (s) buyurdu: Bir şey qalıb? Ayişə dedi: Baş-ayağından başqa bir şey qalmayıb. Peyğəmbər buyurdu: Baş-ayağından başqa hamısı qalıb.»
6241. İmam Əli (ə): «Əvəzə (verdiyinin əvəzini alacağına) əminliyi olan kəs, bağışlamaqda əliaçıq olar.»
6242. İmam Sadiq (ə): «(Malını Allah yolunda) Xərclə və əvəzə əminliyin olsun.»
6243. İmam Sadiq (ə) («malınızdan sərf etdiyiniz….» ayəsinə işarə edərək, malını Allah yolunda xərcləməsinə baxmayraq əvəzini görməməsini iddia edən şəxsə):–«Elə güman edirsən ki, Allah və’dinə xilaf çıxır?» (Həmin şəxs deyir) Dedim: «Xeyr!» Buyurdu: «Bəs səbəb nədir?» Dedim: «Bilmirəm.» Həzrət buyurdu: «Əgər sizdən bir nəfər halal mal qazansa və onu düzgün şəkildə (Allaha görə) haqq yerə xərcləsə, Allah mütləq onun xərclədiyi bir dirhəmin əvəzini verər.»
6244. İmam Sadiq (ə): «Sədəqə vermək borcu ödəyir və bərəkət gətirir.»
1746. İnsanın öz sevdiyi şeydən bağışlaması
Qur‘an:
«Sevdiyiniz şeylərdən (Allah yolunda) xərcləməyincə, əsla (kamil) yaxşılığa nail ola bilməzsiniz. Allah, şübhəsiz ki, (Onun yolunda) xərclədiyiniz hər şeyi biləndir.»
Hədis:
6245. Əbuttufeyl: «Əli (ə) bir paltar aldı. Ondan xoşu gəldi və buna görə də onu sədəqə verdi.»
6246. «əl-Kafi»: «İmam Sadiq (ə) şəkər sədəqə verirdi. O Həzrətə dedilər: Şəkər sədəqə verirsiniz? Buyurdu: Bəli. Şəkəri hər şeydən çox sevirəm və buna görə də istəyirəm ki, daha çox sevdiyim şeydən sədəqə verim.»
1747. Allaha itaət yolunda xərcləməyən, Ona qarşı günah yolunda xərcləyəcəkdir
6247. Allahın Peyğəmbəri (s): «Kim öz xoşu ilə malını yaxşı insanlardan əsirgəsə, Allah məcburi olaraq onun malını pislərə nəsib edər.»
6248. İmam Sadiq (ə): «Haqq yolda bir dirhəm xərcləməkdən imtina edən elə bir bəndə yoxdur ki, nahaq yolda iki dirhəm xərcləməsin.»
6249. İmam Kazim (ə): «Allaha itaət yolunda xərcləməkdən imtina etmə ki, (mütləq) onun ikiqat artığını Allaha itaətsizlik yolunda xərcləyərsən (xərcləməli olarsan).»
1748. Yoxsulun Allah yolunda bir şey xərcləməsinin fəziləti
6250. Allahın Peyğəmbəri (s): «Üç şey imanın həqiqətlərindəndir: yoxsul olanda xərcləmək, camaatla insafla davranmaq və elm axtarana elm bağışlamaq.»
6251. İmam Səccad (ə): «Möminin xislətlərindən biri (Allah yolunda) yoxsulluğu həddində xərcləməkdir.»
1749. Allah yolunda xərclədiyi qəbul edilməyən şəxs
Qur‘an:
«De: İstər könül xoşluğu, istərsə də zorla xərcləyin. Onsuz da sizdən qəbul olunmayacaq. Çünki siz fasiq bir tayfasınız. Onların xərclədiklərinin qəbul olunmasına mane olan, yalnız Allahı və Onun Peyğəmbərini inkar etmələri, namaza tənbəl-tənbəl gəlmələri və istəməyə-istəməyə xərcləmələridir.»
Hədis:
6252. İmam Baqir (ə) («pak olmayan (pis və haram) malı xərcləmək fikrinə düşməyin» ayəsi barədə sualın cavabında):–«İnsanlar İslamı qəbul edəndə, onların əllərində sələm və haram mallardan olan gəlirlər var idi. Onlar mallarının içində həmin gəlirləri axtarır və onları sədəqə verirdilər. Lakin Allah-taala onları bu işdən çəkindirdi. Pak və halal qazancdan başqa şeydən sədəqə vermək düzgün deyil.»
6253. İmam Sadiq (ə): «Əgər insanlar Allahın buyurduğu yolla qazanc əldə etsələr və onu Allahın qadağan etdiyi yolda xərcləsələr, Allah bunu onlardan qəbul etməz. Əgər qadağan etdiyi yolla qazanc əldə etsələr və onu Allahın buyurduğu yolda xərcləsələr, yenə də qəbul etməz. O vaxta kimi ki, düz (və halal) yolla qazansınlar və düz (və halal) yolda xərcləsinlər.»
Kitabın adı: Mizanul – hikmət (xülasəsi) 2-ci cild
Admin: 3
Redaktor: 4
Sayt nəzarətçisi: 7
VİP: 1
İstifadəçi: 6704
Bu gün: 0
