Vüsalə Vətənxan Mehri ilə maraqlı müsahibə

 "Bir ovuc kölgə" və "Ayaq səsi" kitabının müəllifi Vüsalə Vətənxan Mehri ilə maraqlı müsahibə.

-Vüsalə Mehri kimdir,onu necə təqdim edək izləyicilərə?
-Vüsalə Vətənxan Mehri. Gənc yazıçı, şairə kimi.

- Niyә "Vәtәnxan" ?
- Ən aktual, ən çox rastlaşdığım sualdır bu. Vətənxanlı mənim soyadımdır, sadəcə təxəllüs kimi tanıyırlar. Mehri isə yeni təxəllüsümdür, əruzda işlətməyim üçün ?

-Təhsilinizdən və işinizdən danışın
-Mən müxtəlif sahələrdə təhsil almışam. Həm yaradıcılıq fakültəsini bitirmişəm, həm dini təhsilim də var, yəni Şəhriyar adına Mədəniyyət evində Quran, əxlaq və təcvid dərslərini yüksək qiymətlə bitirmişəm. Ayrıca tibbi sahədə də təhsil almışam. İlk öncə praktiki olaraq tibb bacısı işləmişəm. Lakin, həssas insan olduğum üçün tibbi buraxdım. İşlədiyim sahələrdən biri də müəllimlik olub. 2014-2015 illərdə kursda əmək, tikmə-biçmə əsasında dərs demişəm. Hal-hazırda 4 ildir ki, komputer işləri üzrə dizayner işləyirəm.

-Hansı Vüsalә xanım daha uğurludur-şair yoxsa dizayner?)
-Yaradıcılığımla bağlı onu deyə bilərəm ki, az yaşlarından ədəbiyyata marağım olub. Şeirə həvəsim isə daha böyükdür. 2010cu illərdə Ozan proqramına qatılmışdım, həmən illərdə Dirili Qurbaninin də üzvü oldum. Sonralar Vahid, Məcməüş-şüəra və digər ədəbi məclislərdə yer aldım. Hazırda Azərbaycan Yazıçılar Birliyinin Xəzər bölməsinin üzvüyəm.Özüm iki kitab müəllifiyəm. İlk kitabım "Bir ovuc kölgə" - şeirlər toplusu olsa da, ikinci kitabım kimsəsiz uşaqlara həsr etdiyim "Ayaq səsi" hekayə kitabıdır. 
Mən düşünürəm ki, şairə adı alsam da, nəsrdə daha uğurluyam

-Film,kitab vә musiqi zövqünüzdәn danışın
-Filmlərə bir o qədər vaxt ayırmıram, musiqi də demək olar az dinləyirəm, kitablara marağım böyükdür. Ən aktual mövzularda yazılmış əsərləri sevirəm. Ən çox oxuduğum psixoloji tendensiyada yazılmış əsərlərdir.

-Özünüzә rast gәldiyiniz obraz olubmu?
-Tam olmasa da bənzər biri var. Uşaq evində rastlaşdığım kiçik bir qız dostum var, öz uşaqlığımdan danışmağı sevmirəm, lakin onu deyə bilərəm ki, kiçik dostumla bənzərliyimiz bizi çox bağlayıb.

- "Ayaq sәsi" sizә nә qazandırdı
-Çox şey qazandırdı. İlk öncə onu deyim ki gözəl dostlar qazandırdı. Hansı ki daha öncələr uşaqlar evinə ziyarətə gedirdim, tək başına əziyyət çəkirdim, amma bu kitabın çap olunmasında məqsəd sırf kimsəsiz uşaqlara dəstək üçün idi. Mən onların taleyini qələmə almaqla, həm o kitabı xeyriyyəyə verdim ki satışı uşaqlar üçün xərclənsin, həm də çox gözəl dostlarla tanış oldum, onlar bu işdə mənə dəstək oldular və tədbirlər keçirərək hər xırda detalın ərsəyə gəlməsində belə bu yükü mənimlə bir üzərilərinə götürdülər. Qeyd edim ki, kitabın satışı hələ də davam edir və növbəti tədbirə hazırlaşırıq. Mən özümü kimsəsiz uşaqların günahsız simasındakı sevincdə tapıram. “Ayaq səsi” mənim həyat hekayəmin bir parçasıdır. Yarı həqiqət, yarı xəyal olsa da azsaylı oxucularıma bağışladığım təsir məni onlara yetəri qədər tanıdıb zənnimcə.

-Mәşhәddә idiniz,ziyarәt görüşlәrinizdәn danışın
-Məşhəd ziyarəti, İmam Rzanın zəvvarı olmaq gözəl hissdir. Allah arzusunda olan hər kəsə nəsib etsin. Hələ hz Əlinin zəvvarı olmağı deyim, Allah cəmii arzusunda olanlara nəsib etsin. Çox möhtəşəm hissdir

-Nәyi heç vaxt etmәzdiniz?
-Bəli, mən də fikrimcə "yaxşı-pis" seçimlərimə görə öz çərçivəmdən kənar heç nə etmərəm

-İnsanlara nәyi çatdırmaq istәyәrdiniz?
-Birliyi, stabilliyi, təmənnasız paylaşmağı. Hər kəs öz çevrəsinə nəzər yetirib bir-birinə əl tutsa düşünürəm ki bütün çətinliklər həll olar. Əslində hər bir problemin həlli elə özümüzdədir, sadəcə görməzdən gəlirik

-Kimin imzasının hәsrәtindәsiniz?
-Kitablarını sevə-sevə oxuduğum yazıçı, psixoloq Rövşən Abdullahoğlunun "İnsan dünyada" adlı kitabını səbrsizliklə gözləyirəm. eyni tendensiyada olan kitab 4 hissədən ibarətdir. 3-ü çap olunub. "İnsan dünyadan əvvəl", "İnsan dünyadan sonra", "İnsan dünyadan sonradan sonra" bu kitabları oxumuşam. Mənə qaranlıq qalan ikinci hissəsi olan "İnsan dünyada" kitabıdır və üzərindən xeyli vaxt keçsə də ümid verilib çap edilməyən kitabdır. Hələ də həsrətindəyəm. İnşəAllah bir gün çap edilər və müəllifin imzasıyla əldə edərəm...

-Hansı sualın olmasını istәyәrdiniz?
-Zənnimcə kifayətdir, təşəkkür edirəm

-Müsahib olmaq necә idi?
-Gənc nəsillərə tövsiyəm var, analar, atalar göz bəbəyidir. Onları qoruyub saxlayın, övladlarınızı da həmçinin. Onlar da sizin gələcəyinizdir. Tənha yaşayan o qədər insanlar var ki... Onlara bir milyon pul versəniz belə onlar üçün dünyada bir valideynin, və ya övladın varlığını əvəz edəcək sevinc gətirməz.
İkinci dəfədir müsahib oluram, ancaq bu dəfə əvvəlkindən geniş fonda. Təşəkkür edirəm
-Müsahibә üçün tәşәkkür.

***

"Analar ağlayan gecə".

Susur zülmət, susur hər yan, 
Zülmət qəlbimə nur boyan, 
Dayan biraz, ağrı, dayan, 
Analar ağlayan gecə.

Müsahibəni aldı: Əli Əhmədli.