Yeri gəlmişkən belə bir mühüm sualı cavablandırmaq olar. Hərtərəfli inkişaf etmiş dünyada yaşayan insanlar deyirlər, bir tərəfdən bu atalar sözüdür: Əmi oğlu ilə əmi qızının nigahı göylərdə bağlanılıb. Başqa bir tərəfdən də həkimlər deyirlər: Yaxın qohumlar arasında (istər əmi oğlu-əmi qızı, istər dayı oğlu-bibi qızı, istərsə də dayı qızı-bibi oğlu) arasında bağlanan nigahların nəticəsi düzgün və problemsiz olmur. Xüsusilə də bu kimi nigahların nəticəsində dünyaya gələn uşaqlar əlil doğula bilər. Belə olan halda vəzifə nədir?

Bütün varlığımla həkimlərin çəkdiyi zəhmət və aldıqları elmi nəticələrə dərin hörmətlə yanaşaraq onların elminə dəyər verib, vacib olan hörmətimi yerinə yetirdikdən sonra sualın cavabını dini baxımdan qeyd edirəm:

İlk olaraq bilməliyik ki, dini nöqteyi-nəzərdən belə nigahlara nə təşviq edilib nə də tənqid olunub. Belə nigahlar demək olar ki, heç bir ayə və hədislə nə təsdiqlənib nə də qadağan edilib, əksinə bu və buna bənzər işlərin hər ölkənin özünə məxsus adət-ənənələrinə bağlı olduğunu demək olar.

İkinci nöqteyi nəzərdən belə bir həqiqətə toxunmaqla həkimlik sahəsində də başqa sahələrdə olduğu kimi illər boyu fakt kimi icra edildikdən sonra başqa bir elmi nəzəriyə ölçüsündə rədd edilən və qəbahət sayılmayan nəzəriyyələr verilməsi mümkündür. Çünki, insanlar hər gün öz bilmədiklərini öyrənməyə çalışırlar. Necə ki, tapıblar, tapırlar və tapacaqlar.

Üçüncü baxışda tarixi nöqteyi-nəzərdən belə anlayışı izlədikdə atalar sözlərinə çox insanın əməl edərək üçüncü dərəcəli qohumları (əmi qızı, bibi qızı, xala qızı, dayı qızı-əmi oğlu, bibi oğlu, xala oğlu, dayı oğlu) ilə qohumluqlarını yenilədikdən sonra heç bir ciddi problemlə qarşılaşmadıqlarını görürük.

Əziz oxucular, dini nöqteyi-nəzərdən, xüsusilə şiə anlayışında məsumların sözü və işinin bizə höccət olduğu deyilir. Yəni hər məsələ ilə əlaqədar peyğəmbər (s) və məsum imamların aydın şəkildə buyuruqları varsa və ya əməlləri ilə onu təsdiq ediblərsə həmin söz və əməl əməllərin (vacib, müstəhəb, haram, məkruh və mübah) olmasına   höccət və dəlildir.

İslam peyğəmbəri həzrət Məhəmməd ibn Abdullah sallallahu əleyhi və alihi və səlləm yaradılış aləminin hər baxımdan başçısı, sərvəri və rəhbəridir. Gətirdiyi dinin təlimləri insanlara Qiyamət gününə qədər səadət yolunu göstərən təlimlərdir. Yəqin ki, belə mühüm məsələ o həzrətin nəzərindən yayınan bir məsələ ola bilməz.

Həmin məsələyə aid heç bir ayə və açıq-aydın səhih mənbələrdən nəql olunan hədis nəql olunmadığına işarə etməyimizə baxmayaraq   peyğəmbər (s) və məsum imamların əməlləri insanlara ən böyük höccət və dəlildir. Bəs görək bu məsələnin əməldə mübah olmasına aid nə kimi sübutlar var?

Şiə və sünni kitablarında belə bir həqiqətə işarə olunur. İslam peyğəmbəri (s) qızı həzrət Fatimə salamullah əleyhanın nigah məsələsi haqda buyurur: Fatimənin nigah məsələsi mənə aid deyil, əslində Allah-taalanın izni ilə həyata keçirilməlidir. Xüsusilə bu barədə şiə kitablarından əlavə sünni kitablarının da bir çoxunda o cümlədən Yənabiul-Məvəddə, Firdovsul-Əxbar və Məqtəli-Xarəzmidə iki hədis qeyd olunur: Peyğəmbərimiz buyurur: "Allah Əli ibn Əbu Talibi yaratmasaydı Fatimənin misli və bərabəri olmazdı.” Habelə buyurur: "Ey Əli əgər sən olmasaydın Fatimənin yer üzündə misli və bərabəri olmazdı.”

Demək bu iki əmi oğlu və əmi qızının nigah məsələsi birbaşa Allah-taalanın izni ilə həyata keçirilən bir nigahdır. Həmin nigahdan dünyaya gələn övladlar həzrət İmam Həsən Müctəba, həzrət Əba Əbdillahil Hüseyn, həzrət Zeynəb və xanım Ümmü Gülsümdür. Bu günki dünyada yüz mindən artıq sayı olan seyyidlərin çoxu peyğəmbərin(s) haqlarında "Həsən və Hüseyn Cənnət cavanlarının ağasıdır.” buyurduğu iki nəvəsinin nəslindəndir.

Həmçinin həmin ailədən başlayaraq belə bir önəmli nigah Bəni-Haşim tayfasında, xüsusilə də əl-Fatimə nəslində bir qayda olaraq qızları öz əmi oğlanları ilə evləndirməyə çalışıblar. Həzrət Zeynəb salamullah əleyha da öz əmisi oğlu Abdullah ibn Cəfər ibn Əbu Talib ilə ailə qurub.

İndi isə aşağıda birinci imam Həzrət Əlinin (ə) əsrindən on birinci imam Həzrət Həsən Əskərinin (ə) əsrinə qədər nümunə olaraq yüzlərlə əmi oğlu-əmi qızı arasında bağlanan nigah əlaqəsindən iyirmisinə (şəcərədə göstərildiyi kimi) işarə edirik. Ümid edirəm ki, üçüncü dərəcəli qohumlarla nigah bağlamaq həkimlərin tibb sahəsində verdikləri nəzəriyyələr din sahəsində bidət qoymaq kimi nəzərə alınmayacaq, inşallah.1-Həzrət İmam Həsənin (ə) qızı xanım Fatimə həzrət İmam Hüseynin (ə) oğlu İmam Zeynulabidin (ə) ilə nigah bağlayıb. Həmin bağlılığın meyvəsi həzrət İmam Məhəmməd Baqir (ə) və cənab Abdullah Bahirdir.

2-Həzrət İmam Hüseynin(ə) qızı xanım Fatimə   həzrət İmam Həsənin (ə) oğlu Həsəni Müsənna (ikinci Həsən) ilə nigah bağlayıb. Həmin ailədən olan uşaqlar ibarətdir: Abdullah Məhz, Həsəni Müsəlləs (üçüncü Həsən), İbrahim, Zeynəb, Ümmi Gülsüm.

3-İmam Zeynulabidinin (ə) qızı xanım Ümmi Gülsüm əmisi nəvəsi Davud ibn Həsəni Müsənna ilə nigah bağlayıb. Dörd övladları olub: Abdullah, Süleyman, Məlikə və Həmadə.

4-Həmin Məlikə xanım (Davudun qızı) öz əmisi oğlu Həsən ibn Cəfərlə nigah bağlayıb.

5-İmam Baqirin(ə) qızı xanım Ümmi Sələmə əmisi oğlu Məhəmmədlə (Ərqət) nigah bağlayıb. İki oğlan övladları olub: Abbas və İsmail.

6-İbrahim Ğəmərin qızı xanım Rüqəyyə əmisi oğlu İbrahim ibn Abdullahla nigah bağlayıb.

7-İmam Zeynulabidinin (ə) nəvəsi xanım Fatimə əmisi oğlu İmam Cəfər Sadiqlə (ə) nigah bağlayıb. Onların övladları ibarətdir: Cənab İsmail, Abdullah və xanım Fərvə.

8-Cənab Abdullah Məhəzin qızı xanım Zeynəb əmisi oğlu Əli Abid ilə nigah bağlayıb. Doqquz övladları olub: Məhəmməd, Abdullah, Əbdurrəhman, Həsən, Hüseyn, Rüqəyyə, Fatimə, Ümmi Gülsüm və Ümmül Həsən.

9-İmam Baqirin(ə) nəvəsi xanım Fatimə əmisi oğlu həzrət İmam Musa Kazimlə (ə) nigah bağlayıb.

10-Abdullah ibn Hüseynin qızı xanım Ümmi Sələmə əmisi oğlu Əli ibn Ubeydulla ilə nigah bağlayıb.

11-Məhəmməd Nəfsi-Zəkiyyənin qızı xanım Fatimə əmisi oğlu Həsən ibn İbrahim ilə nigah bağlayıb.

12-(Həsən ibn Zeydin qızı) xanım Nəfisə əmisi nəvəsi İmam   Cəfər Sadiqin (ə) oğlu İshaq ilə nigah bağlayıb.

13-Məhəmməd Ərqətin qızı xanım Fatimə əmisi nəvəsi İmam Cəfər Sadiqin (ə) oğlu Əli ilə nigah bağlayıb.

14-O cümlədən xanım Fatimənin bacısı atası Məhəmməd Ərqətin əmisi oğlu cənab Hüseyn Züddəmə ilə nigah bağlayıb.

15-Əbu Məhəmməd Qasim ibn Hüseynin qızı xanım Ubeydə əmisi oğlu Tahir ibn Zeyd ibn Həsən ilə nigah bağlayıb.

16-(Ubeydənin bacısı) xanım Xədicə də əmisi oğlu cənab Əbdüləzim Həsəni ilə nigah bağlayıb.

17-Əli ibn Öməruləşrəfin qızı xanım Xədicə əmisi nəvəsi Əhməd Muxtəfa ilə nigah bağlayıb.

18-Cənab Əbdüləzim Həsəninin qızı xanım Sələmə əmisi nəvəsi Məhəmməd ibn İbrahim ilə nigah bağlayıb.

19-Musa ibn Öməruləşrəfin qızı xanım Səfiyyə əmisi nəvəsi Məhəmməd ibn Qasim ilə nigah bağlayıb.

20-İmam Hadinin (ə) nəvəsi xanım Bureyhə atasının əmisi oğlu Məhəmməd ibn Musa ilə nigah bağlayıb.