Olmaz elə bir kəs, qaça aləmdə əcəldən
Ey nəfs, nədən könlümə təkid eləyirsən,
Yüz tazə günah etməyə təcdid eləyirsən,
Silki-ürəfadan məni təcrid eləyirsən,
Hər gün mənə öz zülmünü təşdid eləyirsən,
Ey ömrü kütah, sən nəyə ümmid eləyirsən?
Şerinlə bütün aləmi tənqid eləyirsən
Şeytanə neçün bir belə təqlid eləyirsən?
Hər iş görə şeytan, ona təmcid eləyirsən,
Bu bəzmidə öz könlünü Cəmşid eləyirsən
Öz ömrünü bica yerə təmdid eləyirsən,
Olmaz elə bir kəs qaça aləmdə əcəldən,
Dünyanı quran, böylə qurub ruzi-əzəldən.
*********************************
Zindandı bu dünya, sən ona daima məhbus,
Qurtarmağa ondan nə ki sən, cümləsi məyus,
Dünya və onun əhli özündən daha mənhus,
Nəfs ilə şəyatin hərəsi bir cürə casus,
Dünyadə nə varsa özünə eyləmə məxsus,
Eylərsə səni şahlığa, sultanlığa məbus,
Əvvəlcə sənə cilvə edər, mislidə tavus,
Amma ki, köçəndə deyəcəklər yenə "əfsus",
Qoymaz səni əfsus eləməkçün deyəcək-"sus",
Ağlarsa da ardınca gər övlad ilə namus,
Olmaz elə bir kəs qaça aləmdə əcəldən,
Dünyanı quran, böylə qurub ruzi-əzəldən.
**********************************
Dünya səni qabil eləsə elmü hünərdə,
Ta olmaya alim bir sən kimi alim bu şəhərdə,
Qiymətdə yetişməzsə sənə dürrü gühər də,
Bir gün çəkəcək elmi-Xuda elminə pərdə,
İstərsən əgər elm mətahın qala sərdə,
Allahı unutma olasan harda, nə yerdə,
Gər düşmə əbəs, dəhrə görə möhnətə, dərdə,
Allaha yaxınlıq gətirər şöhrəti mərdə,
Saxlar kişini Tanrı fəqət gözdə, nəzərdə,
Onsuz da yetirməz səni dünya dəxi bir də,
Olmaz elə bir kəs qaça aləmdə əcəldən,
Dünyanı quran, böylə qurub ruzi-əzəldən.
**********************************
Aldanma sənə dəhr verən ali məqamə,
Beş günlüyə gəl salsa da hər kari nizamə,
Çatdırmayacaq istədiyin arzu, məramə,
Səndən əzəl olmuşmu yetən dəhridə kamə,
Ver guşini Quranda olan dürlü kəlamə,
Sal sidqini Allaha, peyğəmbərlə imamə,
Bu günbədi bənzət sökülən köhnə xiyamə,
Hazırlıq elə burda fəqət, ruzi-qiyamə,
Məhşərdə ola bari üzün bir də səlamə,
Diqqət elə daim bu sözə, ya bu kəlamə,
Olmaz elə bir kəs qaça aləmdə əcəldən,
Dünyanı quran, böylə qurub ruzi-əzəldən.
**********************************
Dünyayə görə sevgili dildarı unutma,
Üqba kimi bir güşeyi-gülzarı unutma,
Huri kimi xoşxilqət olan yarı unutma,
Dünya kimi bir vəhşi sitəmkarı unutma,
Etməz o səninlə yolunu yarı, unutma,
Bir kimsənin olmub hələ qəmxarı, unutma,
Bir mülkdü, qəmdir dərü-divarı, unutma,
Göz yaşını eylər həmişə carı, unutma,
Göz qoy ona daim belə əğyarı unutma,
Yoxdur özü tək daimi bir varı, unutma,
Olmaz elə bir kəs qaça aləmdə əcəldən,
Dünyanı quran, böylə qurub ruzi-əzəldən.
**********************************
Dünya malına, mülkünə divanə olan çox,
Öz meylini bihudə, bu dünyayə salan çox,
Dünya malını heç neçəyə, müftə alan çox,
Düzlük qıt olub, ərşə çıxıb, leyk yalan çox,
Hamballıq edən şeytana çiynində palan çox,
Azdır qazanan dəhridə, amma bac alan çox,
Var-dövlət üçün fikr eləyib, tez qocalan çox,
Dünyayə vida eyləyən hədsizsə, qalan çox,
Gəldikcə cavan nəsl, yenə ömrə dolan çox,
Dünyayə görə kim dedi: -Mail, havalan çox,
Olmaz elə bir kəs qaça aləmdə əcəldən,
Dünyanı quran, böylə qurub ruzi-əzəldən.
**********************************
Admin: 3
Redaktor: 4
Sayt nəzarətçisi: 7
VİP: 1
İstifadəçi: 6678
Bu gün: 0
