Hz. Əmirəlmöminin Əli ibn Əbitalibin (ə) nəzmə çəkdiyi münacat (tərcüməsi)
Həzrət Əmirəlmöminin Əli ibn Əbitalibin (ə) nəzmə çəkdiyi münacat
Tərcüməsi
Bağışlayan və mehriban Allahın adı ilə!
Həm-səna Sənə məxsusdur, ey bağışlayan, böyük və uca Allah!
Sən böyüksən, istədiyinə əta edir və istədiyindən alırsan.
İlahi, ey mənim xaliqim, ey mənim gözətçim və pənahım, mən hər zaman – çətinlik və rahatlıqda Sənin dərgahına üz tutub ah-nalə edirəm!
İlahi, mənim günahım böyük və çox olsa da, Sənin bəxşiş və əfvin mənim günahımdan da böyük və genişdir!
İlahi, mən nəfsi istəklərimə itaət etsəm də, artıq, peşman olmuşam! İlahi, Sən mənim ah-naləmi, yoxsulluq və pərişanlığımı görür, gizli münacatımı eşidirsən!
İlahi, ümidimi üzmə və qəlbimə ümidsizliyi çökdürmə! Mən Sənin sonsuz bəxşişinə ümidvaram.
İlahi, əgər məni naümid etsən və ya Öz dərgahından qovsan, kim məni ümidvar edər? Kim Sənin dərgahında mənə şəfaət verər?
İlahi, məni əzabından amanda saxla! Həqiqətən, mən Sənin əsir, zəlil, qorxan və təvazökar bəndənəm.
İlahi, mənim mənzilim və yatacaq yerim olan qəbirdə – o çətin anda mənə aramlıq verən "dəlil”ini tanıtdır!
İlahi, əgər mənə min əzab versən də, ümidimi Sənin mərhəmətindən üzməyəcəyəm! İlahi, sərvət və övladın heç bir fayda verməyəcəyi gün əfvinin şirinlik və ləzzətini mənə dadızdır!
İlahi, əgər Sən kərəminlə mənim halımı gözləməsən, xar olacaq və əgər lütfünlə halımı gözləsən, xar olmayacağam!
İlahi, əgər Sən xeyirxahlardan başqasını bağışlamasan, onda, nəfsi istəklərinə uyanları kim bağışlayacaq?
İlahi, təqvalı olmaqda səhlənkarlıq etsəm də, artıq, Sənin bəxşiş və əfvinin ardıncayam!
İlahi, nadanlıqdan xətaya yol versəm də, rəhmət və kərəminə daha da ümidvaram, hətta mənə deyirlər ki, nə qədər ah-nalə edir?!
İlahi, günahlarım dağlardan hündür olsa da, Sənin günahlarımı bağışlamağın daha böyük və daha ucadır!
İlahi, Sənin zikrin mənə aramlıq verir, xəta və günahların xatırlanması isə gözlərimi ağladır! İlahi, xətamı bağışla və günahımı məhv et ki, mən günahımı iqrar və onun qorxusundan ah-nalə edirəm!
İlahi, Öz tərəfindən mənə sevinc və rahatlıq bəxş et ki, Sənin lütf və mərhəmətindən başqasının qapısını əsla döymərəm!
İlahi, əgər məni Öz dərgahından qovsan və ya xar etsən, nə fikirləşməli, nə etməliyəm?!
İlahi, Səni istəyən kəs gecəni oyaq qalaraq dua və münacatla məşğul olur, Səndən qafil olan kəs isə sübhə kimi yatır!
İlahi, bu zəif məxluq yuxu ilə oyaqlıq arasındadır və Sənin dərgahında ah-nalə edir! Hamı Sənin ehsanına göz dikir, sonsuz rəhmətinə ümid bəsləyir və əbədi behiştinə tamah edir.
İlahi, Sənin lütfünə ümidim mənə sağlamlıq müjdəsi verir, çirkin əməllərim isə məni qınaq və rüsvayçılığa çəkir!
İlahi, məni bağışlasan, əfvin mənə nicat verəcək, əks-təqdir, həlakətə sürükləyən günah məni həlak edəcək!
İlahi, Sənə and verirəm Haşimi tayfasından olan peyğəmbərin və Sənin dərgahında baş əyən Məhəmmədin və pak bəndələrinin haqqını!
İlahi, Sənə and verirəm Sənin dərgahında baş əyən Mustafanın, əmisi oğlu Əlinin və xeyirxahların haqqını!
İlahi, məni peyğəmbərin Məhəmmədin dini ilə məhşur et, bir halda ki, ah-nalə, təqva və təvazökarlıqla dərgahına üz tutmuşam!
İlahi, ey mənim sərvərim, məni şəfaəti qəbul olunan böyük Peyğəmbərinin şəfaətindən məhrum etmə!
Xeyirxahlar və allahpərəstlər raz-niyaz və Sənin dərgahında baş əydikcə, ona və Əhli-beytinə salam yetir!
"Səhifətun Ələviyyə”də Əmirəlmöminin "Ya Samiu” ilə başlayan nəzmə çəkilmiş başqa münacatı da vardır. Biz ixtisara görə onu burada nəql etmirik.
Kitabın adı: Məfatihul Cinan
 |
Mətndə qramatik səhv var? Onu siçan ilə seçin və
"Ctrl+Enter" düyməsini sıxın (Savab qazanmağa çalışın) |
Bilgilendirme
Yorum Ekleyebilmeniz için Sitemize Kayıt Olmanız Gerekmektedir.
Admin: 3
Redaktor: 4
Sayt nəzarətçisi: 7
VİP: 1
İstifadəçi: 6677
Bu gün: 0
