İmam Hadi (ə)-ın əxlaqi xüsusiyyətlərindən
İlahi nemətlərə diqqət
Əbu Haşim Cəfəri deyir: Əlim çox aşağı idi. Əbu Həsən Əli ibn Məhəmmədin yanına getdim. Mənə daxil olmaq üçün icazə verdi. Həzrət buyurdu: "Ey Əba Haşim! Allahın hansı nemətinə şükr edirsən?” Dilim tutuldu, bilmədim nə cavab verim? İmam sözünə davam edib buyurdu: "(Mehriban Allah) İmanı sənə ruzi etdi və nəticədə cismin cəhənnəm odundan qurtuldu. Sənə sağlamlıq əta etdi. Bununla ibadət və itaətdə yardım göstərmiş oldu. Sənə qənaəti ruzi buyurdu. Nəticədə səni israfçılıqdan qorudu. Ey Əba Haşim! Mən söhbətə ona görə bu mövzuda başladım ki, sənə böyük lütf göstərmiş kəsdən şikayət etmək istədiyini düşündüm. Göstəriş vermişəm ki, sənə yüz dinar versinlər.”
Hava və suyun saflığına diqqət
Fəhham Mənsuri atasının əmisindən belə rəvayət edir: "Bir gün imam Hadi (ə) buyurdu: "Məni məcburi şəkildə Reyin Sur şəhərinə gətirdilər. Əgər bu şəhərdən çıxarsalar narazı qalacağam.” Səbəbini soruşdum. Həzrət buyurdu: "Saf havası və şirin suyuna görə. Burada xəstəlik azdır.”
Şiələrə xüsusi məhəbbət və lütf
İsfahan əhlindən bir dəstəsi, o cümlədən Əbül-Əbbas Əhməd ibn Nəzr və Əbu-Cəfər Məhəmməd ibn Ələviyyə deyir: İsfahanda Əbdürrəhman adlı bir şiə vardı. Ona dedilər: "Nə üçün bir başqasına yox, məhz Əliyyən Nəqinin (ə) imamətinə etiqadı özünə vacib sayırsan?” Dedi: "Şahid olduğum bir səhnə bunu zəruri etdi. Mən yoxsul bir adam idim. İti dilim vardı. Bir gün İsfahan əhli məni bir dəstə adamla kömək istəmək üçün Mütəvəkkilin yanına göndərdi. Mütəvəkkilin sarayında olduğumuz vaxt Əli ibn Məhəmməd ibn Rizanın (ə) oraya gətirilməsi barədə göstəriş verildi. Oradakılara dedim: Buraya gətiriləsi şəxs kimdir?” Dedilər: "Ələvi bir şəxsdir, rafizilər onun imamətinə inanır. Olsun ki, Mütəvəkkil onu qətlə yetirmək üçün tələb edir.” Qərara gəldim ki, onu görənədək sarayı tərk etməyim. Bir qədər ötdü və deyilən şəxs süvari halda saraya yaxınlaşdı. Xalq onu dövrəyə alıb maraqla tamaşa edirdi. Onun görkəmi qəlbimi riqqətə gətirdi və dua etdim ki, Allah onu Mütəvəkkilin şərindən qorusun. Bu şəxs insanların arasından keçərkən yalnız atının yalına baxırdı. Mən fasilə vermədən ona dua edirdim. Yanından keçəndə üzünü mənə tutub buyurdu: "Allah duanı qəbul etdi, ömrün uzandı, sərvətin və malın artdı.” Bütün vücudum həyəcandan əsirdi. Ətrafımdakılar mənə nə olduğunu soruşdular. Məsələni açıqlamayıb "xeyirdir” söylədim. Bu hadisədən sonra İsfahana qayıtdım. Üzümə var-dövlət qapısı açıldı. Təkcə evimdə milyon dirhəmlik avadanlığım var. Allah mənə on övlad əta etdi. Yaşım yetmişi keçib. İndi də həzrətin imamətinə etiqadlıyam. O mənim qəlbimdə olanı oxudu, Allah onun mənim haqqımda dualarını qəbul etdi.
Xəstəyə diqqət və onun müalicəsi
Əbu Haşim Cəfəri deyir: Sur əhlindən bir şəxs qorxulu xəstəliyə tutulmuşdu. Həyat onun üçün zəhərə dönmüşdü. Bir gün Əbu Əliyə öz vəziyyətindən şikayətləndi. Əbu Əli dedi: "Nə vaxt Əbül Həsən Əli ibn Mühəmməd ibn Rizanı (ə) görsən, ondan dua istə. Ümid edirəm ki, xəstəliyin sağalar.”
Həmin şəxs imamın yolu üstə əyləşib onu uzaqdan görən kimi ayağa qalxdı və həzrətə yaxınlaşdı. O həzrətdən özü üçün dua istədi. Həzrət üç dəfə buyurdu: "Allah sənə şəfa versin.” Əbu Əli həmin xəstə şəxslə rastlaşdı və o öz əhvalatını danışdı. Əbu Əli dedi: "O sənə istədiyindən artıq dua etdi. Narahat olma, tezliklə sağalacaqsan.” Xəstə şəxs evinə qayıtdı. Sübh yatağından qalxanda özündə həmin xəstəlikdən əsər-əlamət görmədi!
Qohumlara yaxşılıq
Davud ibn Qasim Cəfəri deyir: Həcc səfərinə hazırlaşırdım. İmamla vidalaşmaq üçün Samirrada onun evinə getdim. İmam yerdə bir dairə cızıb mənə buyurdu: "Bu dairədə olanı götür, səfər üçün xərclə.” Əlimi imamın göstərdiyi yerə uzatdım. Orada içində iki yüz misqal qızıl olan qab vardı!
Heyrətamiz kəramət
Məhəmməd ibn Təlhə deyir: Bir gün imam Hadi (ə) mühüm bir işdən ötrü Samirradan kəndə getdi. İmam yola düşdükdən sonra bir ərəb gəlib onu soruşdu. Bildirdilər ki, filan yerə gedib. Həmin şəxs imamın ardınca gedib onunla görüşdü. İmam ona buyurdu: "İstəyin nədir?” Şəxs dedi: "Mən atam Əli ibn Əbi Talibin vilayətinə bağlı Kufə ərəblərindənəm. Böyük borca düşmüşəm. Səndən başqa ağız açacağım bir şəxs yoxdur.” İmam Hadi (ə) buyurdu: "Narahat olma.” İmam onu minikdən düşürüb qonaq saxladı. Sübh ona buyurdu: "Bir istəyim var, amma çətin razılaşasan!” Ərəb dedi: "Sizə qarşı çıxmaram.” İmam bir kağız götürüb yazdı ki, bu ərəbə filan qədər borcum var. Amma ərəbin borcundan artıq bir məbləğ qeyd etdi. Sonra buyurdu: "Bu kağızı götür. Samirrada yanıma gəlib ətrafındakıların hüzurunda borcunu tələb edərsən. Olmasın ki, mənə qarşı çıxasan.” Ərəb kağızı götürüb dedi: "Yerinə yetirərəm.” İmam Hadi (ə) Samirraya qayıtdıqdan sonra onun ətrafında xeyli adam toplanmışdı. Orada xəlifənin adamları da vardı. Bu ərəb otağa daxil olub imamın yazdığı kağızı göstərdi və borcunu tələb etdi. İmam necə tapşırmışdısa elə də hərəkət etdi. İmam onunla mülayim danışıb mehribanlıq göstərdi. Üzr istəyib borcunu ödəyəcəyini bildirdi. Əhvalatı Mütəvəkkilə çatdırdılar. Mütəvəkkil göstəriş verdi ki, imam Hadiyə (ə) otuz min dirhəm çatdırılsın. Dirhəmlər gətirildikdən sonra imam ərəbə buyurdu: "Bunları götür, borcunu ödə, qalanını da ailənə xərclə.” Ərəb dedi: "Ey peyğəmbər oğlu! And olsun Allaha ki, bunun üçdə birinə ümidim vardı. Allah yaxşı bilir ki, risalətini kimə versin.” O imamın təqdim etdiyi pulu götürüb yola düşdü.
Övlada ad qoyulması
Əyyub ibn Nuh deyir: İmam Hadiyə (ə) yazdım: "Zövcəm hamilədir. Allahdan istə ki, mənə oğul əta etsin.” İmam mənə yazdı: "Dünyaya gələndə adını Məhəmməd qoy.” Bir müddət sonra oğlum oldu və onun adını Məhəmməd qoydum.”
Mənbə: "Əhli-beyt (ə)" kitabı
Admin: 3
Redaktor: 4
Sayt nəzarətçisi: 7
VİP: 1
İstifadəçi: 6704
Bu gün: 0
