Ayətullah Məkarim Şirazinin fətvaları əsasında toxunmaqla bağlı suallara cavab

Sual: Əgər qadın pul və ya başqa bir şeyi naməhrəmə verərkən əli onun əlinə toxunsa, yaxud yollarda, nəqliyyat vasitələrində bədəni yad kişinin bədəninə toxunsa, ya da yad kişinin yanında otursa, bunun hökmü nədir?
Cavab: Əgər pul və ya başqa bir şeyi verərkən əli naməhrəm kişinin əlinə toxunsa haram iş görmüşdür. Amma nəqliyyat vasitələrində, yaxud izdihamlı məkanlarda paltarın üstündən bədəni naməhrəmin bədəninə toxunsa, maneəsi yoxdur, əlbəttə bu hal fəsada yol açmamalıdır. 
Sual: Qadının əlcək geyinib naməhrəm kişi ilə əl-ələ görüşməsinin hökmü nədir?
Cavab: Zəruri olmadığı halda bu işi tərk etmək daha yaxşıdır.
Sual: Paltarın üstündən naməhrəmlə əl-ələ görüşməyin maneəsi varmı?
Cavab: Rəybə, yəni günaha düşmək qorxusu olmasa, paltarın üstündən naməhrəmə toxunmağın maneəsi yoxdur.
Sual: Bizim məntəqədə adət-ənənədir ki, əmi arvadı öz qaynı oğlu ilə əl-ələ görüşür və onu öpür. Yaxud qardaş arvadı öz qaynını və qadın öz bacısının ərini özünə məhrəm hesab edir, buna görə də səfərdən qayıdarkən və ya bayram günlərində əl-ələ görüşüb öpüşürlər. Bu işin haram olduğunu onlara dedikdə də, qəbul etmirlər. Hətta bəzən narahat da olurlar. Belə olduğu hallarda bizim vəzifəmiz nədir? Əgər sileyi-rəhmin (qohumlarıa əlaqənin) pozulmasına səbəb olarsa, hökmü nədir?
Cavab: Bu işlər haramdır və şəriətə ziddir. Belə hallar şəriət qanunlarını bilməməkdən irəli gəlir. Sizin vəzifəniz odur ki, xoş dillə "əmr be məruf" və "nəhy ən münkər" edəsiniz. Əgər sileyi-rəhm öpüşüb görüşmədən  mümkün olmazsa, sileyi-rəhmi kəsin.

Kitabın adı: Hicab
Tərcümə və tərtib edən: Mətanət Hüseynova