Şəfaətlə bağlı bir neçə sualın cavabı

Sual 1. Quranın bir neçə ayəsində bildirilmişdir ki, Qiyamət günü heç kəsə şəfaət olunmayacaqdır, o cümlədən Bəqərə surəsinin 48ci ayəsində buyurulur: "O gündən qorxun ki, heç kəs başqasının haqqını ödəyə, bir diləyi yerinə yetirə və bir əzabı dəf edə bilməyəcək və heç kimin şəfaəti qəbul olunmayacaq. Nə kimdənsə bir əvəz alınacaq və nə də onlara bir kömək göstəriləcəkdir."
Cavab: Bu ayələr Allahın izni olmayan şəfaətlərin qeyri-mümkün olmasını bildirir. Çünki, Quranın bir çox ayələrində Allahın icazəsi ilə şəfaətin baş tutacağı bildirilmişdir.
Sual 2. Şəfaətin mənası Allahın şəfaət edənlərin təsirinə düşməsi deyilmi? Çünki onlar şəfaət etdikdən sonra Allah günahkarı bağışlayır.
Cavab: Belə deyil. Heç kəs Allahı məcbur edə bilməz. Əslində şəfaətçilərin şəfaət etməsi ilə Allahın mərhəmətinə hazırlıq yaranır. 
Sual 3. Şəfaət bu deyilmi ki, şəfaət edənlər Allahdan daha mehribandırlar?
Cavab: Şəfaət edənlərin günahkarlara qarşı mərhəməti Allahın tükənməz rəhmət və mərhəmətinin təzahürüdür. Əslində bu mərhəmət yolunun özünü də Allah açmışdır. O, şəfaətlə günahkar bəndələrin günahını bağışlayır və özünün sonsuz mərhəmətini təzahür etdirir.
Sual 4. Əgər günahkarların ilahi cəzaya məhkum olması Allahın ədalətinə uyğundursa, şəfaətçilərin şəfaətini qəbul etmək Onun ədalətinə ziddirmi?
Cavab: Allahın bütün hökmləri onun ədalətindən və hikmətindən qaynaqlanır. Günahkarın cəzalandırılması hökmü onun günah etməsinə görədir. Həmin şəxsin əzabdan xilas olmasına hökm vermək səbəbsiz deyil. Çünki, bir hökmün indi dəyişdirilməsi həmin hökmün keçmişdə və öz zamanında doğru düzgünlüyünə xələl gətirmir. Bunun başqa nümunələri də var. Allah duadan qabaq bir şəxsə və ya cəmiyyətə bəla göndərməyi təqdir etmişdisə duadan sonra bu bəlanı qaldırır. Hər iki halda Allah səbəbsiz iş görmür. Şəfaət də belədir.
Sual 5. Allahın şəfaət vədi insanların daha çox günah etməsinə və cəsarətli olmasına səbəb olmurmu?
Cavab: Bu sual tövbə məsələsində də meydana çıxır. Qeyd edək ki, günahkar bir şəxsin şəfaət edilməsi bir neçə şərtdən asılıdır. Bir şəxs həmin şərtlərə malik olub-olmadığını əvvəlcədən müəyyənləşdirə bilməz. Həmin şərtlərdən biri insanların ömrünün sonuna qədər Allaha bağlı olan əqidəsini qorumasıdır. Bu şərtin həyata keçməsinə isə heç kim əvvəlcədən zəmanət verə bilməz. Digər tərəfdən günah sahibləri günahlarının bağışlanmasına tam ümidsiz olarsa bu onlarda psixoloji gərginlik yaradar və onları daha ağır günahlara və cinayətlərə sövq edər. Məhz buna görədir ki, peyğəmbərlər və insanların mənəvi tərbiyəsi ilə məşğul olanlar daim onları qorxu ilə ümid içində saxlayırlar. Onlar həm Allahın mərhəmətindən ümidsiz olmamalı (çünki bunun özü də böyük günahdır),həm də günahlarının bağışlanmasına ümidvar olmalıdırlar.

Kitabın adı: İslamda əqidə əsasları
Müəllifin adı: Əllamə Misbah Yəzdi