Gəldi aşura, Hüseynim!
Gəldi Aşura, Hüseynim, yenə matəm günüdür,
Bizə rəhbərlik edənlər bizi zindana yığır.
Əhli möminlər üçün qüssə günü, qəm günüdür,
Bir tərəfdən də bizi rəhbərimiz cana yığır.
Döyərək sinəyə uğrunda fəqan eyləyirik,
Qanayan könlümüzü dərdə məkan eyləyirik.
Sən Yezid üstünə getdin, edərək zülmə qiyam
Bizə zülm etmədədir indi tamam başqa biri.
Susuruq, baxma ki, etməkdə Yezid zülmü davam
Biz diriykən ölüyük, sənsə şəhid, həm də diri.
Bizə sən ağlamalıykən, sənə biz yas tuturuq,
Yası da, matəmi də əqlimizə xas tururuq.
Kimimiz baş yarırıq, vurmada zəncir kimimiz,
Kimimiz qan veririk, xəstəyə dərmandı- deyə
Sanki Nuh dövrüdü, dəryada batıbdır gəmimiz
Qaçırıq haqq savaşından sonu al qandı-deyə.
Fərqimiz varmı bizim səncə dönük Kufəlidən?
Nəfsinə tabe olan qəlbi sönük Kufəlidən?
Adımız əhli-müsəlman, özümüz şahsevənik,
Elimin şah dizi üstündə kəsilmiş göbəyi.
Kimə qulluq edərik, gah söyənik, gah sevənik
Tanrı min fikrə düşən şəxsin olurmu köməyi?
Bizə sən ağlamalıykən, sənə biz yas tuturuq,
Yası da, matəmi də əqlimizə xas tururuq.
Bizə səndən qalan iman yolu, məfkurə yolu
Haqqa üsyan edənə Haqq üçün üsyan yoludur.
Qəlbin imanı ilə qərq edərək nura yolu
Yeri gəldikdə yola canı da qurban yoludur.
Bizsə nahaqqı görüb Haqqı da inkar edərik.
Satıb imanımızı beş quruşa kar edərik.
Edərək il boyu təzim əyərik zülmə boyun
Ildə bir yol olarıq əhli şiə, qan tökərik.
Sənin isminlə çəkib ah, çıxarıb min bir oyun
Harda məzlum görərik, tez başına turp əkərik.
Bizə sən ağlamalıykən, sənə biz yas tuturuq,
Yası da, matəmi də əqlimizə xas tururuq.
Admin: 3
Redaktor: 4
Sayt nəzarətçisi: 7
VİP: 1
İstifadəçi: 6677
Bu gün: 0
