Bu dua, tövbə və onu Allahdan tələb etmək haqqındadır:
İlahi! Vəsf edənlərin vəsfi Səni vəsf edə bilməz, ümid edənlərin ümidi Səndən yuxarı keçməz, əməlisalehlərin mükafatı Sənin yanında zay olmaz və ibadət edənlərin qorxusu Sənə qayıdar. Sən təqva əhlinin qorxusunun sonusan. Bu məkan günah içrə oyuncağa çevrilən bir kəsin yeridir, günahlar cilovu onu irəli qovmuş və Şeytan ona qalib gəlmişdir. Buna görə də Sənin onun üzərindəki qüdrətindən xəbərsiz olan, yaxud onun haqqında ehsan və lütfünü inkar edən kimsə kimi, əmrinin icrasında səhlənkarlıq etmiş, nadanlıq və qürur üzündən qadağan etdiklərinə bulaşmışdır. Nəhayət, hidayət gözünü açıb korluq buludları aradan getdikdə, özünə etdiyi zülmləri sayıb Allahı ilə müxalifətçilik etdiyi işlər haqda düşündükdə, birdən üsyanının böyüklüyünə bəsirət tapdıqda, o zaman ümid dolu qəlb və xəcalətli üzlə üz gətirdi, etimad edərək şövqlə Sənə sarı üz tutdu, yəqin üzündən tamahla Səni səslədi, ixlas və qorxu azuqəsi ilə Səni qəsd etdi. Halbuki Səndən savayı kimsəyə tamah salmamış və Səndən başqa kimsədən qorxmamışdır. Beləliklə, nalə edərək hüzurunda dayandı, zəlilliklə gözünü yerə dikdi, izzətin qarşısında zillətlə başını aşağı saldı, ixlas üzündən Sənin ondan daha yaxşı bildiyin sirrini Sənin üçün aşkar etdi, sidqlə sayını ondan daha yaxşı bildiyin günahlarını Sənin üçün sadaladı, qəza-qədərinlə ona gələn rüsvayçılığından, zilləti ötən günahlardan Sənə pənah gətirdi. Lakin zərərli aqibəti hələ də öz yerində qalmış və yaxasını tutmuşdur. İlahi! Əgər bu bəndənə cəza versən ədalətini inkar etməz və əgər ondan keçib onu əfv etsən və ona rəhm etsən, əfvini böyük saymaz. Çünki Sən kərim Allahsan, böyük günahı bağışlamaq Sənin nəzərində böyük deyildir. İlahi! Artıq mənəm ki, fərmanına baş əyərək hüzuruna gəlmişəm. Dua ilə bağlı əmrinə mütiəm. Qəbuluna vəd etdiyin vədinə vəfa etməyini istəyirəm. Çünki Sən "Məni çağırın ki, duanızı qəbul edim!” – deyə buyurubsan. Ey mənim Rəbbim, Məhəmməd və onun Əhli-beytinə salam yetir və günahıma etiraf etdiyim kimi Sən də məni əfv et, qarşında alçaldığım kimi Sən də mənim xətalarımdan keç və intiqam almaqda tələsmədiyin kimi məni Öz örtüyünə bürü! İlahi! İtaətinə olan niyyətimi möhkəmləndir, ibadətinə olan düşüncəmi sabitqədəm et, məni elə bir əmələ müvəffəq et ki, onunla günahımı yuyasan, dünyadan getdikdə, məni Öz dinin və Peyğəmbərinin dini ilə dünyadan aparasan. İlahi! İndi olduğum vəziyyətdə böyük və kiçik günahlarımla, gizli və aşkar, keçmiş və indiki xətalarımla qəlbindən günaha qayıtmaq keçməyən və fikrinə günaha dönmək girməyən bəndələr kimi, Sənə doğru qayıdıram. Ey mənim Rəbbim! Sən Özün möhkəm olan kitabında buyurubsan ki, bəndələrindən tövbəni qəbul edirsən, günahlarından keçirsən, tövbə edənləri sevirsən, belə isə verdiyin vədə əsasən tövbəmi qəbul et, zamin qaldığın kimi günahlarımdan keç, şərt etdiyin kimi məhəbbətini mənə vacib bil və mən də bütün bu ehsanların müqabilində əhd edirəm ki, Sənin bəyənmədiklərinə sarı qayıtmayacağam. Qınadıqlarına dönməməyimə zəmanət verir və peyman bağlayıram ki, bütün günahlardan uzaq olacağam. İlahi! Məndən baş verən işə Sən daha agahsan. Elə isə yerinə yetirdiklərimlə bağlı xəbərdar olduqlarını mənə bağışla, Öz qüdrətinlə məni sevdiyin şeylərə yönəlt. İlahi! Boynumda bildiyim və unutduğum məsuliyyətlər var. Bütün bunlar Sənin yuxuya dalmayan gözlərin önündədir və unutqanlığa yol verməyən elmin yanındadır. Elə isə o məsuliyyətlərin müqabilində sahibinə əvəz ver, onun çətinliklərini məndən kənarlaşdır, ağırlığını canımın üzərindən götür və onun kimi hadisələrə düçar olmaqdan saxla. İlahi! Sən qorumasan tövbə əhdimi saxlaya və günahdan qoruna bilmərəm. Belə isə məni o yetərli qüdrətinlə gücləndir və Özün mənə günahdan çəkinməkdə yardım göstər. İlahi! Dərgahına tövbə edən hər bəndənin əhdini pozub, günaha meyil etməsini bilirsən, belə olmaqdan Sənə pənah aparıram. Artıq bu tövbəmi elə bir tövbəyə çevir ki, ondan sonra tövbəyə ehtiyac duymayım; elə bir tövbə ki, keçmiş günahların məhvinə və ömrümün qalan günlərində günahlardan amanda qalmağıma səbəb olsun. İlahi! Öz nadanlığıma görə Səndən üzr istəyir və pis əməlinə görə məni əfv etməyini diləyirəm. Öz lütfünlə məni rəhmətinin pənahında yerləşdir, ehsanınla mənə əmin-amanlıq libası geyindir. İlahi! Qəlbimdən keçən, gözümün xəyanəti ilə, dilimlə deyilən və istəyinlə müxalif olan, yaxud məhəbbət dairəndən kənar olanlardan elə bir tövbə edirəm ki, bədən üzvlərimdən hər biri əzabdan amanda qalsın və günahkarların qorxduğu qəzəbindən nicat tapsın. İlahi! Dərgahındakı təkliyimə, qorxundan ürəyimin çırpınmasına, heybətindən bədənimin titrəməsinə rəhm et. Çünki ey mənim Rəbbim, günahlarım məni dərgahında rüsvayçılıq kürsüsündə oturtmuşdur. Əgər danışmasam kimsə mənim tərəfimdən söz deməz, əgər özüm şəfaət etsəm, bir kəs deyiləm ki, şəfaətim qəbul olunsun. İlahi! Məhəmməd və onun Əhli-beytinə salam yetir, kərəmini günahlarıma şəfaətçi qərar ver və Öz əfvinlə pisliklərimi bağışla. Məni Öz cəzanla cəzalandırma, ehsanını üzümə geniş aç, məni əfv pərdənlə ört, mənimlə zəlil bir bəndənin qapısına gedib ona rəhm edən qüdrətli və yaxud yolunun başında oturan fəqirin əlindən tutan dövlətli kimi davran. İlahi! Sənin qarşında bir pənahım yoxdur. Buna görə də izzətin mənə pənah verməlidir, Sənin dərgahında şəfaət edənim yoxdur. Buna görə də lütfün mənə şəfaət etməlidir. Günahlarım qorxuya salmışdır. Buna görə də əfvin məni əmin etməlidir. Çünki pis əməlimə görə cəhalət üzündən dilimə gətirdiklərim keçmiş pis işlərimi unutmağım üzündən Sənin göyün və onda olanlar, yer üzün və üzərində olanlar aşkar etdiyim cəhalətimi və Sənə pənah apardığım tövbəmi eşitsinlər ki, bəlkə bunlardan birisi halıma rəhm etsin, yaxud halımın ağırlığına kövrəlsin, bəlkə Öz tərəfindən mənim üçün biri dua etsin ki, mənim öz duamdan Sənin dərgahında qəbula daha yaxın olsun, yaxud da mənə elə bir şəfaət nəsib olunsun ki, öz şəfaətimdən daha möhkəm olsun, qəzəbindən nicat tapıb razılığına yetişməyimlə yanaşı olsun. İlahi! Əgər Sənin dərgahında tövbə peşmançılıqdırsa, mən hamıdan çox peşmanam, əgər günahı tərk etmək tövbə sayılırsa, mən ilk tövbə edənəm, əgər Səndən bağışlanma diləmək günahların aradan getməsinə səbəb olursa, mən Sənin dərgahında bağışlanma diləyənlərdənəm. İlahi! Tövbəyə rəğbətləndirib qəbul edilməsinə vəd etdiyin kimi, Məhəmməd və onun Əhli-beytinə salam yetir, tövbəmi qəbul et, məni rəhmətindən ümidsiz və məyus halda qaytarma. Çünki Sən günahkarların tövbəsini qəbul edən və Sənə doğru səmimi qəlblə qayıdanların xətalarını bağışlayansan. İlahi! Məhəmməd və onun Əhli-beytinə salam yetir ki, onun vasitəsi ilə bizə kəramət nəsib etdin. Məhəmməd və onun Əhli-beytinə salam yetir ki, qiyamət və ehtiyac günü bizə şəfaət etsin. Doğrudan da, Sən hər şeyə qadirsən, o iş Sənə asandır.
Kitabın adı: Məfatihul Cinan
Admin: 3
Redaktor: 4
Sayt nəzarətçisi: 7
VİP: 1
İstifadəçi: 6741
Bu gün: 1
