1-İslam peyğəmbəri(s) buyurur:

      Allah-taala orucluq ayında oruc tutan, şəhvətinin, yeməyinin və dilinin qarşısını alan, başqasına əziyyəti olmayan kəsin keçmişdəki xəta və günahlarını və gələcək xətalarını bağışlayar. Onu oddan azad edib, özünün əmin-amanlıq evində ona yer vərər. Cabir ibn Abdullah Ənsari dedi: Ey Allahın rəsulu, nə gözəl hədis buyurdunuz? Həzrət buyurdu: Ey Cabir qoyduğum şərtlər necə də çətindir.

2-Həzrət Əli(ə) buyurur:

      Bir çox oruc tutan var ki, orucdan bəhrəsi ac və susuz qalmaqdır. Bir çox   ibadət edənlər var ki, onlara yalnız ibadətin zəhməti qalır. (Belə olan halda) xoş o   zirək insanların halına ki, yatmaqları axmaq adamların ibadətinə dəyər. Xoş zirək oruc yeyənlərin halına ki, əməlləri ağılsızların orucundan üstündür.

3-Həzrət İmam Məhəmməd Baqir(ə) buyurur:

      Mələklər orucluğun son günü oruc tutanlara deyərlər: Ey Allahın bəndələri, sizə müjdə olsun, Allah-taala günahlarınızı bağışladı, tövbənizi qəbul etdi. Elə isə bundan sonra nə edəcəyinizə baxın.

4-Həzrət İmam Cəfər Sadiq(ə) buyurur:

      Hər şeyin zəkatı var. Bədənlərin zəkatı da orucdur.

5-Şəban ayının xütbəsi:

      İslam peyğəmbəri(s) Şəban ayının son cüməsinin xütbəsində Ramazan ayı haqqında çoxlu tapşırıqlar verib. O   cümlədən buyurur: Ey camaaat, qarşıda gündüzləri günlərin ən gözəli, gecələri gecələrin ən gözəli olan bir ay gəlir. O ayda Allah-taala sizi öz ziyafətinə dəvət edib. O ayda olan Qədr gecəsinin dəyəri min aydan daha fəzilətli sayılır. Bu ayda bir gecənin müstəhəb namazlarını qılan başqa aylarda yetmiş gecə ibadət etmiş kimidir. Ramazan ayının mükafatı yalnız Allah-taalanın Cənnətidir. O ayda mömin insana iftar verənin keçmiş günahları bağışlanar... O ayda gözlərinizi naməhrəmə baxmaqdan örtün, eşidilməsi halal olmayan şeylərdən qulaqlarınızı saxlayın. O ayda səcdələrinizi uzatmaqla günahlarınızı yüngülləşdirin. Ramazan ayında bir ayə Quran oxuyanın savabı başqa aylarda bir Quran xətm etməsi kimidir. O ay elə bir aydır ki, onun əvvəli rəhmət, ortası bağışlanmaq, sonu isə duaların qəbul olunmasıdır...