Bilin ki, İmam Hüseynin ziyarətinin fəziləti bəyanetmə qüdrətindən xaricdir. Bir çox rəvayətlərdə onun Həcc, Ümrə və cihad kimi, əməllərdən mərtəbələrlə üstün və fəzilətli olması, bağışlanmağa, qiyamət günün hesabının yüngülləşməsinə, dərəcələrin üstün olmasına, duaların qəbul olmasına, ömrün uzun olmasına, bədənin sağlam olmasına, mal-dövlətin qorunmasına, ruzinin artmasına, hacətlərin rəva olmasına və qəm-qüssənin aradan getməsinə səbəb olur. Onu tərk etmək isə din və imanda nöqsan yaranmasına və peyğəmbərin boynumuzda olan haqlarından ən böyüyünü tərk etmiş oluruq.
Həzrətin zairinə veriləcək ən az savab odur ki, onun günahları bağışlanar, Allah taala onun malını, canını qoruyar, onu öz əhli-əyalına qovuşdurar, xüsusilə qiyamət günündə Allah taala onu daha çox qoruyar.
Bir çox rəvayətlərdə buyurulur ki, o həzrətin ziyarəti qəm-qüssəni aparır, can verməyi asanlaşdırır, qəbrin qorxu və vəhşətini götürür. Hər kəs o həzrətin ziyarəti yolunda malından xərc etsə, hər dirhəm pulu üçün min dirhəmin, bəlkə də on min dirhəmin savabı yazılar. O həzrətin qəbrinə doğru gedən kəsi min mələk pişvaz edər, qayıdan zaman yenə həmin mələklər onu yola salarlar. Peyğəmbərlər, övsiyalar, məsum imamlar və mələklər o həzrətin ziyarətinə gələr, onun zəvvarlarına dua edər, müжdələyərlər. Allah-Taala "Ərəfat”da olanlardan çox onlara Öz rəhmət nəzərini salar. Qiyamət günündə o həzrətin zəvvarlarının başıucalığını və kəramətlərini müşahidə edənlər o həzrətin zəvvarlarından olduğunu arzulayarlar. Bu haqda nəql olunan rəvayətlər olduqca çoxdur. Biz o həzrətin məxsus ziyarətini qeyd edərkən fəzilətinin bir qisminə işarə edəcəyik. Burada isə bir rəvayəti gətirməklə kifayətlənirik: İbni Quləveyh, Şeyx Kuleyni, Seyid ibni Tavus və başqaları mötəbər sənədlərlə Müaviyə ibni Vəhəb Bəclinin belə dediyini nəql etmişlər: "Bir dəfə İmam Cəfər Sadiq (ə)-ın hüzuruna getdim və o həzrəti ibadət mehrabında namaz qıldığını gördüm. Namazını qurtaracağı vaxta qədər gözləməli oldum. O həzrətin Allahla belə münacat etdiyini eşitdim: "İlahi! Bizi kəramətlərə məxsus bilmisən, şəfaət vədəsi vermisən, risalət elmlərini bizim öhdəmizə qoymusan, bizi Peyğəmbər varisi, keçmiş ümmətləri bizimlə xətm, bizi Peyğəmbərin vəsiyyətinə məxsus, gələcəyi bizə əta, insanların qəlblərini bizə doğru meyilli etmisən. İlahi! Məni və Əba Əbdillahil Hüseyn (ə)-ın qəbrini ziyarət edənləri – o kəsləri ki, mal-dövlətlərindən keçib uzaq şəhərlərdən bizə məhəbbət bəsləmək məqsədi və bizə qarşı sileyi-rəhmi yerinə yetirmək üçün Sənin savabını qazanmaq ümidi ilə gələnləri, Sənin Peyğəmbərini şad edənləri, bizə cavab verənləri, düşmənlərini qəzəbləndirənləri bağışla! Onların məqsədi Sənin razılığını qazanmaqdır. Belə isə onları bizim tərəfimizdən sevinclə mükafatlandır, gecə-gündüz onları qoru, onların xəlifəsi ol, bütün inadkar düşmənlərin, eləcə də yaradılışın zəif və güclüsünün, şeytan, cin və insanların şərrini onlardan dəf et!... İlahi! Düşmənlərimiz onlara bizim ziyarətimizə gəlmək istədikləri üçün eyb tutdular və bu, onların gəlişinə mane oldu. Buna görə də Günəşin dəyişdiyi simalara rəhm et! Üzlərini İmam Hüseynin (ə) qəbrinə tutanlara və sürtənlərə rəhm et! Bizə məhəbbət məqsədilə göz yaşları tökənlərə rəhm et! Bizim müsibətimizə görə yanan ürəklərə rəhm et! İlahi! O ruhları və bədənləri Sənə tapşırıram ki, susuz bir gündə "Kövsər” hovuzundan sirab edəsən!...” O həzrət həmişə səcdədə belə dua edərdi. O həzrət duanı qurtardıqdan sonra dedim: "Mənim sizdən eşitdiyim duanı Allahı tanımayan bir kəs haqqında etsəydiniz, elə güman edərdim ki, cəhənnəmin atəşi onu əsla yandırmayacaq. And olsun Allaha! Bu zaman həccin ziyarətini yox, İmam Hüseynin (ə) ziyarətini arzuladıqda, Həzrət buyurdu: "Ey Müaviyə! Sən necə də o həzrətə yaxınsan, o həzrəti ziyarət etməyinə mane nədir? Bu ziyarəti əsla tərk etmə!” Dedim: "Sənə qurban olum! Bu qədər fəziləti bilmirdim.” Həzrət buyurdu: "Ey Müaviyə! O həzrətin ziyarətinə gələnlər üçün səmada dua edənlərin yer üzündə dua edənlərin sayından qat-qat çoxdur. Qorxudan o həzrətin ziyarətini tərk etmə, çünki qorxub, o həzrətin ziyarətini tərk edənlər həsrət çəkərək deyəcəklər ki, kaş, o həzrətin yanında o qədər qalardım ki, elə orada da dəfn olardım. Məgər istəməzsənmi ki, Allah taala səni Peyğəmbəri-Əkrəm (s), Əli (ə), Fatimə Zəhra (s) və məsum imamların dua etdikləri kəslərin içərisində qərar versin? Məgər istəməzsənmi ki, qiyamət günü mələklərin görüşdükləri kəslərdən və Qiyamətə heç bir günahı olmayan halda gələnlərdən və Peyğəmbəri-Əkrəm (s)-in görüşdüyü kəslərdən olasan?
Kitabın adı: Məfatihul Cinan
Admin: 3
Redaktor: 4
Sayt nəzarətçisi: 7
VİP: 1
İstifadəçi: 6704
Bu gün: 0
