12-ci dərs - Quranın təhrifdən qorunması
Yuxarıdakı bəhsdə Quranın İlahi bir kitab
olaraq, möcüzə olub başqalarının onun kimi kitabın
bir miqdarını hətta gətirməyə qüdrətlərinin olmadığını
bildik. Bu, Quran üçün böyük bir imtiyaz və onun
əlçatmaz bir yüksəklikdə olmasını sübut edir.
Quran elə bir kitabdır ki, onun barəsində nə
qədər təhqiqlər olunsa yeni mətləblər meydana çıxır.
Quranın ilahi bir möcüzə olduğu bir daha yəqinləşir.
Quran başqa bir cəhətdən də böyük bir
möcüzədir. O da Qurani-Kərimin 1400 ildə təhrif
olunmamağıdır. Biz bilirik ki, başqa asimani kitablar
həmən dinlərin öz insanları tərəfindən təhrif olunub,
bəzi şəxslərin mənafeyinə uyğunlaşdırılmışdır.
Özlərini peyğəmbərələrdən sonra onun davamçıları
elan eləyənlər hətta asimani kitablarını da öz
mənafelərinə uyğun döndərməyə cəsarət ediblər. Biz
burada məsələnin xırdalıqlarına varmaq istəmirik,
amma onu da bilirik ki, Həzrət Musa (ə)-ın, ya Həzrət İsa (ə)-ın yerinə layiq olmaq iddiasını edənlər, o
həzrətlər kimi edə bilmədiklərinə görə, onların
gətirdiyi qanunlara düzgün əməl etmədikləri üçün
məcbur olub ilahi kitabları öz həvəslərinə uyğun təhrif
etdilər.
Amma, Qurani-Kərim qiyamətə qədər
ümumbəşəri bir qanun, cahanşumul bir mədəniyyət,
bəşərə nicat verə biləcək əxlaqi mövzulara və başqa
minlərlə üstünlüyə malik olan bir kitab olduğuna və
ilahi kitablar silsiləsinin ən kamil və sonuncusu
olduğuna görə onu qoruyub saxlamağı Allah-Təala öz
öhdəsinə götürmüşdür. "Biz Quranı nazil etmişik, biz
də onu qoruyacağıq” – buyurmuşdur Uca Tanrı.
Əvvəlcə təhrif və onun qismləri barədə bir neçə
kəlmə danışaq.
Qurani-Məcidin təhrifi barəsində bəhs iki cəhətdən
təhqiq olunur:
1. Mənəvi təhrif
2. Ləfzi təhrif
Ləfzi təhrif özü üç surətdədir: 1. artıqlıq, 2. əskiklik,
3. Tərtib
1. Mənəvi təhrif
Qurani-Kərimin mənəvi cəhətdən təhrif
olunmamasında şübhə yoxdur. Belə ki, tarixdə çox görünübdür, bəziləri öz rəy və nəzərlərinə uyğun
Quranın ayələrini təfsir ediblər. (Elə bu günkü
kimi). Bu məqsədə Qurani-Kərimin "Ali İmran”
surəsinin 7 – ci ayəsi də dəlalət edir: "Fitnə
salmaqdan ötəri qəlbləri xəstə olanlar Quranın
mütəşabeh ayələrinin ardınca gedirlər (Yəni onu öz
rəyləri ilə təfsir edirlər)”.
Quranın "mütəşabeh” ayələri mənası zahirdən
məlum olmayan ayələrdir. Bəziləri də bu ayələri
fitnə salmaqdan ötəri öz rəylərinə uyğun təfsir
edirlər. Bu da həmin mənəvi təhrif deməkdir.
2. Ləfzi təhrif
Amma ləfzi təhrif, bu cürə ki, Qurana bir hərf
artıralar, ya əksildələr, bütün müsəlman firqələrinin
ittifaqı ilə qəbul olunur ki, belə bir şey olmayıb.
Əvvəlcədən müsəlmanlar Quranı əzbərləməyə,
sonralar yazmağa həddindən artıq səy etdilər. Həzrət
Peyğəmbər (s)-in də onların üzərində nəzarəti çox
olub. Bunlar da göstərir ki, Qurana bir şey artırılıb,
əskilsə idi vaxtında qarşısı alınardı. Bundan əlavə
Quranda olan fəsahət və bəlağət göstərir ki, ona bir
şey əlavə olunmayıb, çünki Quran ilahi kəlamdır,
onun fəsahəti və bəlağəti də ilahi dərəcədədir. Əgər
ona bir şey əlavə olunsaydı, bəşər kəlamı olduğu üçün seçilərdi. Əgər ondan bir şey əksilsəydi onda da ilahi
kəlamın fəsahət və bəlağətdən düşməsi nəzərə
çarpardı.
12-ci dərsin sualları
1) Quran ləfzi təhrifə məruz qalıbmı? Cavabınızı
nəqli (ayə, hədis və ya rəvayət) və əqli dəlillərlə
əsaslamdırın.?
2) Quranın mənəvi təhrifə məruz qalmasını nə cür
başa düşürsünüz? Nüminə olaraq, mənəvi
təhrifin mümkün olmasına dəlalət edən bir ayə
gətirin.
Kitabın adı: Peyğəmbər (s) və Əhli-Beyt (ə)-ın məktəbində Quranşünaslıq
Müəllif: Hacı Əhliman Rüstəmov